Imvo n’Imvano ku myaka 30 yizihizwa n’ikigo Maison Shalom ca Marguerite Barankitse [Maggy]

Mu kiganiro Imvo n’Imvano kuri uyu munsi wa gatandatu tariki ya 30 z’ukwezi kwa 3 umwaka 2024 turaganira ku myaka 30 yizihizwa n’ikigo Maison Shalom. Ni ikigo cyashingiwe mu gihugu cy’u Burundi ariko ubu kirakorera ibikorwa byacyo mu Rwanda.

Bamwe bamwita Nyirakuru w'igihugu, abandi bakamwita Mama w'igihugu: Ayo ni amazina yahawe Marguerite Barankitse, impirimbanyi akaba n’uwashinze ikigo cya Maison Shalom gikora ibikorwa byo gufasha abatishoboye cyane cyane abashyizwe mu kaga n’ubwicanyi bushingiye ku bwoko bwagiye bubaho mu bihe bitandukanye mu Burundi.

Marguerite Barankitse [Maggy] yahungiye mu Rwanda muri 2015 ashinjwa na leta y’u Burundi kuba yarifatanije n’abashatse guhirika ubutegetsi, we arabihakana.

Turasura bimwe mu bikorwa bya Maison Shalom biri mu Karere ka Kirehe mu Burasirazuba bw’u Rwanda hanze y’inkambi ya Mahama icumbikiye impunzi z’Abarundi.

Mu gihe ikigo cye cya Maison Shalom kizihiza imyaka 30 kimaze, Barankitse avuga ko n’ubwo yataye ibikorwa bye byinshi mu gihugu cye, nta bushake afite bwo gutaha mu gihe umutekano utari wagaruka. Iki kiganiro kiramuha ijambo. Ni mu gihe Leta y’u Burundi yo imaze igihe ishishikariza impunzi z’Abarundi gutahuka, ikavuga ko mu Burundi kuri ubu hari amahoro.

Ni ikiganiro mwateguriwe kandi mugezwaho na Yves Bucyana.