Abarwanyi barenga 300 bava mu bihugu bya Afurika bapfiriye muri Ukraine, 6 ni Abarundi – Raporo nshya

Abarwanyi barenga 1,400 baturutse mu bihugu bigera kuri 35 bya Afurika biyandikishije kurwanira Uburusiya muri Ukraine kuva mu 2023 kandi abagera kuri 316 muri bo bamaze gupfa, nk'uko biri muri raporo y'iperereza ryakozwe n'ikigo INPACT yatangajwe uyu munsi.

Kuva mu 2023 Uburusiya bwashyize imbaraga mu gushaka abarwanyi bavuye mu bihugu by'amahanga nyuma yo gutakaza umubare munini w'abasirikare mu ntambara bwagabye muri Ukraine kuva muri Gashyantare(2) 2022.

Ukraine na yo yavuzweho gushaka abarwanyi mu mahanga.

Umuhate w'Uburusiya wo kuvana abarwanyi muri Afurika, aho Kremlin ifite ubucuti n'ibihugu bitandukanye, henshi ukorwa mu bwihisho, hagakoreshwa amayeri atandukanye yo kwizeza ibyiza abajya mu Burusiya, nk'akazi keza, umushahara munini, amashuri, cyangwa inzira yoroshya yo kujya ahandi i Burayi.

BBC Gahuzamiryango yamenye 'network' y'abantu mu Burundi bashishikariza urubyiruko rw'abarundi kujya mu Burusiya, kwiga cyangwa se guhabwa akazi keza, bamwe batanze amafaranga kugira ngo babashe kugenda.

Raporo yasohowe na INPACT ivuga ko kuva mu 2023 kugeza hagati mu 2025 Uburusiya bwinjije mu gisirikare cyabwo abarwanyi 1,417 bava mu bihugu 35 bya Afurika.

Iki kigo kivuga ko cyabonye amazina yabo, imyaka yabo, ibihugu baturutsemo, nimero za gisirikare bahawe n'igihe basinyiye amasezerano yo kwinjira mu gisirikare cy'Uburusiya.

INPACT ivuga ko yagenzuye ikabona 316 muri bariya bapfiriye ku rugamba, ikabona imyaka yabo, n'igihe bapfiriye, n'umutwe w'ingabo barimo mu gisirikare cy'Uburusiya.

Iyi raporo ivuga ko muri abo barwanyi baguye ku rugamba abava muri Cameroun ari bo benshi (94), mu gihe batandatu (6) muri abo bapfuye bava mu Burundi.

Muri abo barundi, umukuru yari afite imyaka 41 naho umuto yari afite imyaka 26.

Mu bihugu byavuyemo bariya barwanyi muri kiriya gihe (2023 – hagati mu 2025), harimo ibyo mu karere, urutonde rwa INPACT rwerekana ko;

Misiri iza imbere mu bihugu bya Afurika ahavuye abagabo 361, Cameroon havuye 335 na Ghana havuye 234, nk'uko raporo ya INPACT ibigaragaza. Gambia(56), Mali(51), Nigeria(36), Afurika y'Epfo(32) ni ahandi na ho havuye benshi.

Iyi raporo isohotse nyuma y'umunsi umwe urubuga rushamikiye ku biro bya perezida wa Ukraine rutangaje inkuru y'umurundi Jean Bosco Akimana ufungiye muri Ukraine nk'imfungwa y'intambara nyuma y'uko yari yaragiye mu Burusiya azi ko agiye kwiga, nk'uko yabivuze.

Ibyavuzwe na Akimana BBC ntiyabashije kubigenzura mu buryo bwigenga, kandi yabitangaje nk'imbohe y'intambara ku rubuga rutangaza ibibogamiye kuri Ukraine muri iyi ntambara.

BBC Gahuzamiryango yabajije uruhande rwa leta y'u Burundi ivuga ko ikibazo cya Akimana yakibonye ku mbuga ariko nta cyo irabivugaho.

Kuri iyi raporo nshya, BBC yagerageje kuvugisha leta y'u Burundi ntibyashoboka kugeza ubu.

Investigations with Impact (INPACT) ni ikigo kivuga ko cyigenga cyatangiye mu 2021 gikora amaperereza ahanini yibanda k'Uburusiya n'inshuti zabwo, All Eyes On Wagner ni umwe mu mushinga wabo wamenyekanye cyane.

INPACT ivuga ko abareshya urubyiruko rwa Afurika ngo rujye mu Burusiya barwizeza "amahirwe yo kwiga", ndetse no kuba bava mu Burusiya mu buryo bworoshye "bakajya mu bindi bihugu by'iburayi".

Mu kureshya abajya ku rugamba, INPACT ivuga ko yasanze hari 'agences/agencies' zibikora zikuriwe n'abantu bashyigikiye Uburusiya muri ibyo bihugu, zikagera ku bantu ziciye ku makuru zahawe mbere na mbere n'abandi bagiye mu Burusiya mbere muri ubu buryo.