Virusi ya Marburg ntikirangwa mu Rwanda – inzego z'ubuzima
Ahavuye isanamu, Getty Images
- Umwanditsi, Jean Claude Mwambutsa
- Igikorwa, BBC Gahuzamiryango i Kigali
Abategetsi b'u Rwanda batangaje ku mugaragaro ko bamaze gutsinda icyorezo cya Marburg nyuma y'amezi atatu umurwayi wa mbere agaragaye mu gihugu.
Hari hashize iminsi abategetsi bagaragaza icyizere ko virusi ya Marburg yamaze gucika.
Aho yatangazaga ugutsindwa kwa virusi ya Marburg, Minisitiri w'ubuzima Dr Sabin Nsanzimana yavuze ko hari hashize iminsi 42 yikurikiranya nta murwayi mushya ugaragaye.
Iki gihe ngo ni na cyo kigenwa n'amabwiriza y'ishami ry'Umuryango w'Abibumbye ryita ku buzima (OMS/WHO) ku birebana n'imicungire y'ibyorezo.
Inzego z'ubuzima mu Rwanda zivuga ko habayeho ugukora ubutaruhuka kugira ngo iki cyorezo gikomwe imbere.
Benshi mu bapfuye bari abaganga
Amakuru yatangajwe na minisiteri y'ubuzima avuga ko igice kinini cy'abantu bapfuye ari abaganga, cyakora umubare w'abaganga bapfuye cyangwa uw'abarwayi basanzwe ntiwatanzwe ku buryo busobanutse.
Kuva umurwayi wa mbere yagaragara mu mpera y'ukwezi kwa cyenda, abantu 66 ni bo byatangajwe ko barwaye iyi ndwara. 15 yarabahitanye naho 51 bashoboye kuvurwa barakira.
Minisiteri y'ubuzima ivuga ko uwa nyuma wahitanywe n'iyi virusi yagaragaye ku itariki ya 15 y'ukwezi kwa 10, ikavuga kandi ko nta murwayi n'umwe usigaye mu bitaro.
Iyi virusi yaje ivuye he?
Byafashe igihe kirekire abashinzwe ubuzima batarashobora kugaragaza aho iyi virusi yateye ituruka.
Gusa nyuma minisiteri y'ubuzima yaje gutangaza ko iyi virusi yazanywe na bumwe mu bwoko bw'uducurama twabaga mu birombe by'amabuye y'agaciro mu nkengero z'umujyi wa Kigali.
Mu gihe bimaze gutangazwa ko Marburg yatsinzwe burundu, ngo hagiye gukurikiraho ibikorwa byo gushakisha mu birombe by'amabuye y'agaciro byo mu nkengero z'umujyi wa Kigali.
Minisiteri y'ubuzima ivuga ko virusi ya Marburg yanduje umuntu wa mbere yakomotse ku gacurama, kandi ko kabaga mu birombe byegereye Kigali.
Ahavuye isanamu, Getty Images
Nta kwirara...
Minisiteri y'ubuzima ivuga ko hagiye kuvugururwa uburyo bwo gukurikirana ibyorezo hashingiwe ku byagaragaye kuri iyi virusi.
Iyi virusi byemejwe ko yadukiye mu gace kegereye cyane umurwa mukuru, mu gihe ibindi byorezo bihera mu bice by'icyaro bisatira imijyi.
Minisitiri w'ubuzima yavuze ko nta kwirara. Impuguke mu by'ubuzima ngo zigiye kujagajaga mu gace katurutsemo iki cyorezo kugira ngo virusi itazongera kubaca mu jisho.
