Umwongereza uvuka mu Buhinde ni we mugenzi wenyine warokotse impanuka y'indege yo mu Buhinde

Umugabo w'Umwongereza ukomoka mu Buhinde yagenze n'amaguru ava mu bisigazwa by'indege ya kompanyi Air India yo mu Buhinde yakoze impanuka ikica abantu 241, nyuma yo kurokoka mu buryo budasanzwe.

Vishwash Kumar Ramesh yari yicaye mu ntebe ifite nimero 11A, mu ndege ya Boeing 787 yari yerekeje ku kibuga cy'indege cya Gatwick i London mu Bwongereza ku wa kane, igakora impanuka nyuma gato yo guhaguruka ku kibuga cy'indege cy'i Ahmedabad, mu burengerazuba bw'Ubuhinde.

Uwo mwanya yari yicayemo uherereye iruhande rw'umuryango wo gusohokeramo byihutirwa mu gihe cy'amakuba, uri mu gice cy'imbere y'ibaba ry'ibumoso ry'indege.

Nayan Kumar Ramesh, umugabo uvukana na Ramesh, yabwiye BBC News ko Vishwash Kumar "na we ntazi ukuntu yarokotse" wenyine iyo mpanuka y'indege.

Air India yavuze ko abandi bagenzi bose n'abakozi bo mu ndege bishwe n'iyo mpanuka – barimo n'Abahinde 169 n'Abongereza 52.

Nayan yabwiye BBC ko "kumubona [Ramesh] ameze neza biranshimishije cyane" ariko ko ahangayitse kubera undi mugabo bavukana, Ajay, na we wari uri muri iyo ndege.

Yagize ati: "Twese twari twumiwe tucyumva ibyabaye, twari twumiwe neza neza. Twari twabuze icyo twavuga."

"Na we ubwe [Ramesh] ntazi ukuntu yarokotse, [ntazi] ukuntu yavuye mu ndege.

"Ubwo yaduhamagaraga yari ahangayikishijwe cyane n'undi muvandimwe wanjye, ameze nk'umbwira ngo 'Shaka Ajay, shaka Ajay.' Icyo ni cyo kintu cyonyinye yitayeho muri aka kanya."

Mwenewabo witwa Jay yabwiye ibiro ntaramakuru PA byo mu Bwongereza ati: "Afite ibikomere bicyeya mu maso. Amaraso amuriho. Ntekereza ko ameze neza. Twumiwe cyane."

Videwo yatangajwe ku mbuga nkoranyambaga igaragaza Ramesh agenda n'amaguru yerekeza ku modoka y'imbangukiragutabara ('ambulance'), umwotsi uzamuka hirya ye.

Nyuma yabonetse aryamye ku gitanda mu bitaro, yasuwe na Minisitiri w'ubutegetsi bw'igihugu w'Ubuhinde Amit Shah.

Dr Dhaval Gameti, muganga wavuye Ramesh, yagize ati: "Yari ari mu rujijo, afite ibikomere byinshi ku mubiri wose. Ariko birasa nkaho nta kaga arimo."

Ibitangazamakuru byo mu Buhinde byatangaje uruhushya rwe rumwemerera kwinjira mu ndege (ruzwi nka 'boarding pass' cyangwa 'carte d'embarquement'), rugaragaza izina rye na nimero y'intebe yari yicayemo.

Uwo mucuruzi, wavukiye mu Buhinde ariko ubu akaba aba mu Bwongereza guhera mu mwaka wa 2003, afite umugore n'umwana w'umuhungu w'imyaka ine.

Iyo ndege yakoze impanuka yaguye mu icumbi abaganga bimenyereza umwuga bacumbikamo, nyuma y'igihe kitageze ku munota umwe ihagurutse ku kibuga cy'indege cy'i Ahmedabad muri leta ya Gujarat.

Umubare w'abantu bapfiriye aho yaguye ntuzwi neza ndetse n'icyateye iyo mpanuka ntikiramenyekana.

Iyo ndege ya kompanyi Air India yari ifite nimero y'urugendo AI171.

Iyo kompanyi yavuze ko yari yahagurutse ku kibuga mpuzamahanga cy'indege cya Sardar Vallabhbhai Patel International Airport, cyo mu mujyi wa Ahmedabad, saa saba n'iminota 39 z'amanywa ku isaha yaho (13:39), ni ukuvuga saa yine n'iminota 39 (10:39) ku isaha yo mu Rwanda no mu Burundi.

Byari biteganyijwe ko igera ku kibuga cy'indege cya Gatwick i London saa kumi n'ebyiri z'umugoroba n'iminota 25 (18:25 BST), ni ukuvuga saa moya z'ijoro n'iminota 25 (19:25) ku isaha yo mu Rwanda no mu Burundi, ku wa kane.

Videwo yagenzuwe na BBC igaragaza iyo ndege ubwo yamanukaga, nyuma humvikana guturika cyane ubwo yikubitaga hasi.