Abantu nibura 14 bishwe n'imyuzure n'inkangu muri Koreya y'Epfo
- Umwanditsi, Maia Davies na Je Seung Lee
- Igikorwa, BBC News
Abantu nibura 14 bishwe n'imyuzure n'inkangu byatewe n'imvura nyinshi imaze iminsi igwa muri Koreya y'Epfo, nkuko ikigo cyo guhangana n'ibiza cy'icyo gihugu cyabivuze.
Hari ubwoba ko uwo mubare w'abapfuye ushobora kwiyongera kuko ibikorwa by'ubutabazi bikomeje. Byatangajwe ko abantu 12 baburiwe irengero.
Abantu hafi 10,000 barimuwe bakurwa mu ngo zabo kuva iyi mvura nyinshi itangiye kugwa ku wa gatatu, naho ingo zirenga 41,000 zabuze umuriro w'amashanyarazi by'igihe gito, nkuko ibitangazamakuru byo muri icyo gihugu bibivuga.
Iyi mvura ahanini ubu yagabanutse mu turere yaguyemo cyane two mu majyepfo no rwagati mu gihugu, ariko indi mvura nyinshi iteganyijwe kugwa mu murwa mukuru Séoul no mu turere two mu majyaruguru.
Ahavuye isanamu, Yonhap/Reuters
Imihanda n'inyubako byose hamwe bibarirwa mu bihumbi byangiritse ndetse birengwaho n'amazi y'imyuzure ikaze. Amakuru avuga ko imirima yangiritse cyane ndetse ko n'amatungo menshi yapfuye.
Byinshi mu byasenyutse ni ibyo mu majyepfo y'igihugu. Abantu batandatu bapfuye naho abandi barindwi baburiwe irengero mu karere ka Sancheong.
Mu karere ko mu majyaruguru k'imisozi miremire kari hafi y'umujyi wa Séoul, na ho abantu bapfuye abandi barakomereka, ndetse no mu tundi turere tw'uburengerazuba n'amajyaruguru.
Kuri iki cyumweru habaye kuburira mu turere twinshi tw'igihugu ko hitezwe inkangu (ihirima ry'ubutaka cyangwa amabuye byo ku musozi) zikomeye.
Ni mu gihe leta ya Koreya y'Epfo yatangije igikorwa gihuriweho n'inzego nyinshi cyo gusubiza ibintu mu buryo.
Byitezwe ko iyi mvura ihita mu ijoro ryo kuri iki cyumweru, igakurikirwa n'igihe cy'izuba ryinshi.
