Rihanna yahishuye ko atwite inda y'umwana wa gatatu

Umuhanzi Rihanna yahishuye ko atwite inda y'umwana wa gatatu ubwo yari yitabiriye ijoro rikomeye ry'umwaka mu mideli rizwi nka Met Gala i New York.

Rihanna w'imyaka 37 yapfumbase inda ye maze asekera abafotora ubwo yari ageze kuri 'red carpet' ngo atambuke.

Robyn Fenty, amazina ye nyakuri, n'umukunzi we umuhanzi wa rap A$AP Rocky, basanzwe bafitanye abahungu babiri.

A$AP Rocky, witwa Rakim Mayers, yashimiye abanyamakuru bari aho ngaho bahise bifuriza uyu muryango kwishyuka.

Yagize ati: "Ni cyo gihe ngo twereke abantu icyo turiho."

Rihanna ni we winjiye bwa nyuma mu nzu ya Metropolitan Museum of Art icyo gikorwa cyaberagamo, kugira ngo iri murikamideli ritangire.

Buri mwaka ibyamamare byambara imyenda y'agatangaza igendanyen'intero iba yateguwe. Iy'uyu mwaka yari "Superfine: Tailoring Black Style," bwa mbere kuva mu 2003 yari iyo kwibanda ku myenda y'abagabo.

A$AP Rocky, umwe mu bategura iki gikorwa, yatangarije aho kuri 'red carpet' ko uyu mukunzi we atwite.

Ati: "Nishimiye ko buri wese atwishimiye kuko natwe turishimye cyane."

Umuhungu wa mbere wabo witwa RZA yavutse muri Gicurasi(5) 2022 naho murumuna we, Riot, avuka muri Kanama(8) 2023.

Rihanna, icyamamare muri muzika no mu bucuruzi, azwiho gutangaza mu buryo bwo guhishura amakuru yo gutwita kwe.

Ubwo yari atwite umwana wa mbere yabitangaje akoresheje amafoto yafashwe ari kumwe n'umukunzi we i Harlem muri New York mu 2022.

Ubwo yataramiraga abitabiriye umukino wa Super Bowl mu 2023 nabwo yahishuye ko yari atwite inda y'umwana wa kabiri.

Si we cyamamare cya mbere uhishuye ko atwite muri Met Gala – uwahoze ari umukinnyi wa tennis, Serena Williams n'umumurikamideli Karlie Kloss na bo berekanye ko batwite muri iki gikorwa cyo mu 2023.