Menya uko byagenze ubwo P Diddy yaguye apfukamye yumvise umwanzuro w'urukiko

Ku wa gatatu i New York, abacamanza 12 baburanisha urubanza rwa Sean Combs wamenyekanye cyane nka P Diddy, bamubwiye ko basanze ari umwere ku byaha byo gukoresha imibonano mpuzabitsina abakobwa bakundanye na we hagamijwe inyungu, no gucuruza abantu mu buraya.

Uyu muhanzi wa hip-hop yahise agwa apfukamye umutwe we awutsindagira ku ntebe imbere y'ameza aho amaze amezi abiri aburanira ibyaha aregwa.

Mbere y'umwanzuro w'urukiko, Diddy yari yicaye atuje ku ntebe ye, areba imbere, yambaye umupira wera wo kwifubika n'ipantaro, imyenda yakunze kwambara muri uru rubanza.

Mu cyumba cy'urukiko habaye umutuzo ubwo umwanditsi w'urukiko yaherezaga umucamanza inyandiko y'umwanzuro w'urukiko. Maze umucamanza ayisubiza uyu mwanditsi, nuko atangira gusoma.

Ubwo ijambo "ntabwo ahamwa n'icyaha" ryumvikanaga bwa mbere ku cyaha gikomeye cyane Diddy yaregwaga cy'umugambi munini wo gukoresha abantu ibyaha hagamijwe inyungu, yakomeje kubika umutwe.

Ubwo umwanditsi yongereagaho ko Diddy ari umwere ku cyaha cyo gukoresha abantu uburaya hagamijwe inyungu, yahise ashyira umutwe we mu biganza.

Urukiko rwavuze ko ahamwa n'icyaha cyoroheje kurusha ibindi mu byo yaregwaga, cyo gutwara abantu gukora uburaya. Ubwo bemezaga umwanzuro wabo, Diddy yakomeje gushyira ibiganza bye mu maso.

Nyuma gato, uyu mugabo ufunze kuva mu kweiz kwa Nzeri(9) umwaka ushize, yahise atangira kwerekana ibimenyetso ko yishimye.

Yakoze ikimenyetso cy'ibiganza cyo gusenga yereka abacamanza, maze arahindukira akora icyo kimenyetso nanone ku muryango we – impanga ze z'abakobwa, abahungu be, na nyina w'imyaka 85 bari aho.

Ku munwa, yagaragaye ababwira ngo: "Ndaje imuhira".

Uwo mwanya kandi warimo amarangamutima ku bunganizi be, barimo Teny Geragos wari umwicaye iruhande yihanagura amarira n'agatambaro nyuma y'uko umwanzuro usomwe.

Kugirwa umwere ku byaha bikomeye kurusha ibindi bisobanuye ko bitagikenewe ko akomeza gufungwa, nk'uko umwe mu bunganizi be Marc Agnifilo yahise abwira urukiko.

Yagize ati: "Combs ahawe ubuzima n'iyi nteko y'abacamanza, nta kintu azica mu byo uru rukiko ruri bumutegeke."

Diddy yahise akora ikindi kimenyetso cy'amarangamutima akomeye ubwo yapfukamaga agatsindagira umutwe we ku ntebe yicaraho.

Yahagurutse, akoma amashyi cyane, ahobera benshi mu bunganizi be, abo mu muryango we n'abamushyigikiye bari mu cyumba cy'urukiko, maze abandi bamushyigikiye na bo bari aho batangira kwerekana ibyishimo.

Nuko nyuma y'akanya gato asohorwa mu rukiko ngo ategereze ikindi cyiciro cyo kuburana asaba ku gufungurwa by'agateganyo.

Gusa icyizere cye cyo gutaha cyahise gihagarikwa ubwo umucamanza Arun Subramanian yamwimaga kurekurwa by'agateganyo mu rindi buranisha ryakurikiyeho nyuma ya saa sita.

Hanze y'urukiko rwa Manhattan, hari abantu benshi bariho baririmba ngo "free Diddy" [rekura Diddy].

Gusa, arakomeza gufungwa kugeza nibura mu kwezi k'Ukwakira (10) - ku biteganyijwe - aho urukiko ruzatangaza ibihano rumukatiye ku cyaha rwamuhamije, icyaha gishobora gufungirwa imyaka 20.