Amerika yabaye ihagaritse imfashanyo kuri Gabon kubera Coup d'État

Amerika ivuga ko yabaye ihagaritse imfashanyo yahaga Gabon, nyuma y'ihirikwa ry'ubutegetsi ryahabaye mu kwezi gushize.

Mu itangazo, Minisitiri w'ububanyi n'amahanga w'Amerika Antony Blinken yagize ati: "Tubaye duhagaritse gahunda zimwe z'imfashanyo yo mu mahanga kuri guverinoma ya Gabon mu gihe dusuzuma ibyakozwe na bamwe mu basirikare b'icyo gihugu binyuranyije n'itegekonshinga."

Muri iryo tangazo, Blinken yavuze ko iyo ngamba y'igihe gito ihuye n'ibikorwa byakozwe n'umuryango wo mu karere k'Afurika yo hagati, umuryango w'Ubumwe bw'Afurika (AU/UA) n'abandi bafatanyabikorwa bo mu mahanga, nyuma yuko habaye ihirikwa ry'ubutegetsi muri Gabon.

Umuryango w'ubukungu w'ibihugu byo muri Afurika yo hagati (CEEAC) na AU byabaye bihagaritse Gabon ku kuba umunyamuryango.

Minisiteri y'ububanyi n'amahanga y'Amerika yavuze ko icyemezo cyo kuba ihagaritse imfashanyo kuri Gabon kizagumaho "mu gihe dusuzuma uko ibintu bimeze yo [muri Gabon]".

Ariko iyo minisiteri yavuze ko ibikorwa by'Amerika bikomeje muri icyo gihugu, harimo nk'ibikorwa byo mu rwego rwa diplomasi n'ibyo kuri ambasade byo guha ubufasha Abanyamerika.

Ku itariki ya 30 Kanama (8) uyu mwaka, abakuru bo mu gisirikare cya Gabon batangaje ko bahiritse Perezida Ali Bongo, nyuma gato yuko akanama k'amatora gatangaje ko yatsinze amatora.

Perezida Bongo yari ku butegetsi kuva mu mwaka wa 2009, ubwo yasimburaga se, Omar Bongo, wari umaze gupfa. Omar Bongo yari yageze ku butegetsi mu 1967.

Agatsiko ka gisirikare ko muri Gabon kasezeranyije gukoresha amatora mu bwisanzure no mu mucyo, ariko ntikatanze ingengabihe yayo.

Muri uku kwezi kwa Nzeri (9), Raymond Ndong Sima, Minisitiri w'intebe mushya wa Gabon washyizweho n'ako gatsiko, yabwiye BBC ko iki gihugu kizakoresha amatora mu gihe kitarenze imyaka ibiri iri imbere.