Uburakari muri Ukraine kubera Macron wavuze ati 'Ntimukoze isoni Uburusiya'

Minisitiri w'ububanyi n'amahanga wa Ukraine yarakariye Perezida w'Ubufaransa Emmanuel Macron nyuma yuko avuze ko ari ingenzi cyane ko Uburusiya budakozwa isoni mu gitero cyabwo muri Ukraine.

Macron yavuze ko ari ingenzi cyane ko Perezida w'Uburusiya Vladimir Putin ahabwa inzira yo kunyuramo ava mu cyo Macron yise "ikosa rikomeye".

Ariko Minisitiri w'ububanyi n'amahanga wa Ukraine Dmytro Kuleba yavuze ko inshuti z'iki gihugu zikwiye "kwibanda cyane kurushaho ku buryo bwo gushyira Uburusiya mu mwanya wabwo" kuko "bwikoza isoni bwo ubwabwo".

Macron amaze igihe avugana na Putin kuri telefone mu kugerageza gutuma habaho agahenge n'ibiganiro.

Amagerageza y'Ubufaransa yo gutuma hakomeza kubaho ikiganiro na Perezida Putin, atandukanye n'aho Amerika n'Ubwongereza bihagaze.

Mu butumwa bwo kuri Twitter, Minisitiri w'ububanyi n'amahanga Kuleba yavuze ko "ubusabe bwo kwirinda gukoza isoni Uburusiya bushobora gukoza isoni Ubufaransa gusa n'ikindi gihugu icyo ari cyo cyose cyabisaba".

Ukraine ivuga ko Uburusiya butagomba kugira ubutaka bwemererwa na Ukraine kugira ngo buhagarike intambara, mu gihe igitero cy'Uburusiya cyamaganwe henshi ku isi nk'ubushotoranyi burimo ubugome.

Mbere yaho, Macron yabwiye ibitangazamakuru byo mu karere ko mu Bufaransa ko Perezida w'Uburusiya "yishyize mu kato".

Yagize ati: "Ndatekereza ko, kandi narabimubwiye, yakoze ikosa ryanditse amateka kandi rikomeye ku baturage be, kuri we ubwe no ku mateka".

Yongeyeho ati: "Kwishyira mu kato ni ikintu kimwe, ariko gushobora kukikuramo ni inzira igoye".

Minisitiri w'intebe w'Ubutaliyani Mario Draghi yagiye ku ruhande rwa Macron, yumvikanisha ko Uburayi bushaka "ibiganiro byo kwizerwa".

Imirwano ikaze i Severodonetsk

Umujyi wa Severodonetsk wo mu burasirazuba bw'igihugu uracyari izingiro ry'imirwano muri Ukraine, aho abasirikare ba Ukraine barimo kwirwanaho bikomeye ku bifaru by'Uburusiya, abasirikare babwo barwanira ku butaka hamwe n'urufaya rw'ibisasu by'imbunda za rutura.

Gufata uyu mujyi byatuma akarere ka Luhansk kajya mu maboko y'abasirikare b'Uburusiya hamwe n'abarwanyi bafatanya na bo baharanira ubwigenge bo muri ako karere, bagenzura igice kinini cy'akarere ka Donetsk bituranye.

Guverineri w'ako karere ka Ukraine Serhiy Haidai yavuze ko abasirikare be bisubije hafi kimwe cya gatanu (1/5) cya Severodonetsk kandi ko bashobora kuhagumana.

Yagize ati: "Tukimara kubona intwaro zihagije zirasa kure twemerewe n'uburengerazuba, tuzirukana imbunda zabo za rutura zijye kure y'ibirindiro byacu. Ubundi, ndababwiza ukuri, abasirikare barwanira ku butaka b'Uburusiya bazahita birukanka gusa".

Amerika irateganya guha abasirikare ba Ukraine uburyo bw'ubwirinzi bwa rokete burasa kure kandi buhamya kurushaho, kugira ngo bashobore kurasa ku birindiro by'abasirikare b'Uburusiya kandi bari kure yabyo.

Ubwongereza na bwo buvuga ko buzoherereza Ukraine uburyo bunini burasa rokete nyinshi icyarimwe.

Hakurya ya Severodonetsk urenze umugezi wa Siverskyi Donets, hari umujyi wa Lysychansk. Iyi mijyi yombi ni ingenzi cyane ku Burusiya mu rwego rw'urugamba.

Severodonetsk irimo uruganda rw'ibinyabutabire rwa Azot, rukora ifumbire ikozwe mu kinyabutabire cya Nitrogen, mu gihe Lysychansk irimo uruganda rwa kabiri runini muri Ukraine rutunganya ibitoro.

Ubu imirwano imaze gusenya igice kinini cya Severodonetsk, ariko abaturage b'abasivile babarirwa mu bihumbi baracyihishe mu nzu zo munsi zo muri uwo mujyi.

Guverineri Haidai yavuze ko abasirikare b'Uburusiya barimo guturitsa amateme ku mugezi bakayasenya, mu kubuza ko abasirikare ba Ukraine bazana abo kubunganira ku rugamba no mu kubuza ko batanga imfashanyo ku baturage b'abasivile.

Mu yandi makuru: