Agaciro ka Bitcoin kamanutseho 50% kuva ku gasongero ko mu kwa 11

Agaciro ka Bitcoin kakomeje kumanuka muri weekend aho kageze munsi ya $34,000 (34,000,000Frw) kuri bitcoin imwe, nk'uko bivugwa n'ikigo Coinbase kivunja cryptocurrency.

Agaciro ka Bitcoin, ifaranga ry'ikoranabuhanga rinini kuruta andi, ubu kamaze kumanukaho 50% kuva ku kagasongero kagezeho mu Ugushyingo(11) umwaka ushize.

Kumanuka kw'agaciro k'amafaranga y'ikoranabuhanga bibaye nyuma y'uko n'agaciro k'amasoko y'imigabane ku isi kaguye muri iyi minsi.

Ibihugu byinshi ku isi bikurikiranira hafi iby'amafaranga y'ikoranabuhanga, umwaka ushize u Rwanda na Tanzania byavuze ko birimo kwiga ku ikoreshwa ry'ayo mafaranga.

Centrafrique yo iheruka kwemeza Bitcoin nk'ifaranga ryemewe mu gihugu.

Bitcoin yihariye agaciro kangana na 1/3 cy'ayandi mafaranga y'ikoranabuhanga, ifite agaciro kagera kuri miliyari $636.

Ethereum, cryptocurrency ya kabiri nini mu gaciro ku isi, nayo akayo kamanutseho hejuru ya 10% mu cyumweru gishize.

Nubwo umwaka wa 2022 wari utuje ku isoko rya cryptocurrency, agaciro kayo karahindaguritse cyane mu myaka yabanje.

Nyuma y'imyaka myinshi isoko ryayo rishorwamo n'abantu ku giti cyabo, mu myaka ya vuba abashoramari babigize umwuga n'abaherwe batangiye gushora imari zabo muri cryptocurrency. Agaciro kayo karatumbagira.

Ibi byatumye bene aya mafaranga atangira kugendana n'ibijyanye n'agaciro gasanzwe k'amasoko y'imigabane ku isi.

Cryptocurrency ni iki?

Ni umutungo udafatika ushingiye ku ikoranabuhagna rya cryptography ryacuzwe n'umuntu utazwi uwo ari we kugeza ubu, uretse kuba hazwi izina rye nka Satoshi Nakamoto.

Rishingiye ku kugura cryptocurrency (urugero Bitcoin, ari nayo yashinzwe na Nakamoto, nyuma hakaza n'izindi) ukayirindisha ijambo ry'ibanga kandi akaba ari naryo ukoresha mu kuyigurisha n'uwundi uyikeneye.

Nubwo agaciro ka Bitcoin imwe gusa ubu ari $34,000 ushobora kugura ibice byayo (munsi ya rimwe) ku madorari ayo ariyo yose ufite ugahinduka umushoramari muri cryptocurrency.

Mu 2008 Nakamoto amaze gutunganya iri koranabuhanga ryifashishije codes mu buryo bwa blockchain, Bitcoin imwe yari ifite agaciro kari munsi y'idorari rimwe, ariko uko abantu ku giti cyabo bagiye bagura Bitcoin bishyuye amadorari niko agaciro kayo kagiye kiyongera.

Kugura no kugurisha cryptocurrency bigenzurwa n'abahanga mu ikoranabuhanga bazwi nka 'miners' bari ahatandukanye ku isi mu buryo bwo kumvikana ku mirongo y'ubuhanga n'imikorere ya Blockchain yashyizweho na Nakamoto.

Ni ifaranga rya mbere ritashyizweho kandi ritagenzurwa na za leta. Bituma benshi babishima nk'ubwigenge mu ifaranga abandi bakavuga ko biteye impungenge.

Ubusanzwe, iyo hariho ibihe biteye inkeke ku isoko mpuzamahanga ry'imari, abashoramari bagurisha imitungo babona iri mu kaga bakagura iyo bakeka ko itekanye kandi iri mu nyungu.

Niko byagenze mu myaka ya vuba ishize ubwo benshi bitabiraga gushora imari muri cryptocurrencies zitandukanye zimaze kubaho. Mu Ugushyingo (11) 2021 Bitcoin imwe yageze ku gaciro ko hejuru cyane ka $68,000.

Mu cyumweru gishize, banki nkuru zo mu bihugu byinshi ku isi, harimo n'iya Amerika, Ubwongereza, na Australia, zazamuye inyungu ku nguzanyo mu kugerageza guhangana n'izamuka ry'ibiciro.

Ibi byatumye abashoramari bagira impungenge ko guta agaciro ku masoko, n'ikiguzi kinini cy'inguzanyo, bishobora kugira ingaruka mbi ku iterambere ry'ubukungu ku isi.

Abashoramari kandi bafite impungenge z'ingaruka z'intambara y'Uburusiya muri Ukraine ku bukungu bw'isi.

Kugeza ubu ibihugu bya El Salvador na Centrafrique byemeje Bitcoin nk'ifaranga ryemewe mu gihugu.

El Salvador yo yavuze ko igiye kwemerera abaguzi gukoresha cryptocurrency mu bucuruzi bwose kimwe n'idorari rya Amerika, gusa ikigega mpuzamahanga cy'imari ku isi cyayisabye kwisubiraho kuri uwo mwanzuro.