Nagaenthran: Singapore yanyonze umugabo ufite uburwayi mu mutwe kuko yahazanye heroin

Umugabo wo muri Malaysia wahamwe no kugerageza kwinjiza ibiyobyabwenge muri Singapore yahawe igihano cy'urupfu, nk'uko mushiki we yabyemereye BBC.

Nagaenthran Dharmalingam yari amaze imyaka irenga 10 akatiwe icyo gihano kubera kugegeza kwinjiza muri icyo gihugu heroin ingana n'ibiyiko bitatu byo ku meza.

Urubanza rwe ntirwavuzweho rumwe nyuma y'uko abaganga bamupimye bagasanga afite Intelligence Quotient - IQ ya 69 - urugero ruvuze ko afite ibibazo mu bwenge.

Ariko leta yavuze ko "yari asobanukiwe neza ubwoko bw'ibyo yariho akora".

Kuwa kabiri urukiko rwaburijemo gutakamba kwa nyuma kwa nyina, ruvuga ko Nagaenthran yaciye "inzira zose ziteganywa n'itegeko", ko nta handi ho kujuririra hasigaye mu myaka 11 amaze mu nkiko.

Nyuma y'iburanishwa ryo kuwa kabiri, Nagaenthran n'umuryango we bahuriye ku idirishya ry'ikirahure basa n'abahana ibiganza barira bose, nk'uko ibiro ntaramakuru Reuters bibivuga. Mu rukiko babashaga kumva uyu musore arira ati: "mawe".

Mu itangazo leta yari yasohoye mbere, yavuze ko basanze "atarigeze atakaza ubwenge bwo kumenya icyiza n'ikibi by'igikorwa yakoraga".

Mu 2009, Nagaenthran yafashwe arimo yinjira muri Singapore avuye muri Malaysia afite 43g za heroin zihambiriye ku itako ry'iburyo.

Ku mategeko ya Singapore - ari mu akarishye cyane ku isi - abafashwe batwaye hejuru ya 15g za heroin bakatirwa urwo gupfa.

Mu rubanza rwe, uyu mugabo w'imyaka 34 yari yabanje kuvuga ko yahatiwe gutwara ibi biyobyabwenge, ariko nyuma avuga ko yabikoze kuko yari akeneye amafaranga.

Urukiko rwavuze ko kwiregura kwe kwa mbere "kwari ibihimbano". Nyuma rumukatira kwicwa amanitswe.

Mu 2015, yarajuriye asaba ko icyo gihano gihindurwa icyo gufungwa burundu kubera ko afite ubumuga bwo mu mutwe.

Abanyamategeko be bavuze ko kwica umuntu urwaye mu mutwe bibujijwe mu mategeko mpuzamahanga y'uburenganzira bwa muntu.

Ariko urukiko rwavuze ko nta burwayi yari afite mu mutwe akora icyaha. Imbabazi za perezida yasabye umwaka ushize nazo yarazimwe.

Urubanza rwe, ku mbuga nkoranyambaga ku isi rwakuruye inkubiri z'abashyigikiye igihano yakatiwe n'abacyamaganye barimo umuherwe Richard Branson.

Abantu ibihumbi basinye inyandiko isaba, ivuga ko kwica umuntu ufite uburwayi bwo mu mutwe binyuranyije n'amategeko.

Kumwica kuwa kabiri nabyo byamaganywe n'umuryango uharanira uburenganzira witwa Reprieve wavuze ko "yazize ubucamanza bubi".

Maya Foa, ukuriye Reprieve yagize ati: "Iminsi ye ya nyuma yayimaze nk'imyaka icumi ishize, mu iyicarubozo ryo gufungwa wenyine. Twifatanyije n'umuryango we utarahwemye kumurwanaho. Agahinda kabo karenze urugero."

Impirimbanyi yo guca igihano cy'urupfu muri Singapore yitwa Kirsten Han yasohoye ifoto none kuwa gatatu, iriho Nagaenthran yambaye imyenda bivugwa ko yakundaga cyane.

Leta ya Singapore yavuze ko amategeko mpuzamahanga atabuza igihano cy'urupfu kandi nta masezerano mpuzamahanga ariho kuri cyo.

Leta kandi ivuga ko Nagaenthran atari guhabwa icyo gihano iyo basanga "afite uburwayi bwo mu mutwe".