Ukraine - Russia: Abanyeshuri ba mbere ba Ghana bahunze intambara bageze i Accra
Itsinda rya mbere rigizwe n'abanyeshuri 17 bo muri Ghana ryageze i Accra mu gitondo kuwa kabiri nyuma yo guhunga bava muri Ukraine ahari intambara.
Abo banyeshuri babashije guhungira muri Romania nyuma y'ibitero by'Uburusiya, bamwe muri bo mu buryo bugoranye cyane, nk'uko umunyamakuru wa BBC i Accra abivuga.
Ghana nicyo gihugu cya mbere muri Africa kivanye abaturage bacyo Iburayi nyuma yo guhunga bava muri Ukraine.
Aba baje bari mu barenga 200 babashije guhungira muri Poland, Hungary, Romania, Slovakia, na Czech Republic, mu gihe abandi barenga 400 bari mu nzira berekeza ku mipaka, n'abandi baheze mu mijyi ya Kharkiv, Mariupol na Sumy.
Umuvugizi wa leta y'u Rwanda kuwa mbere yabwiye BBC ko muri Ukraine hakiri abanyarwanda 34 "bari ahantu hari imirwano ubu badashobora kuhava".
Alain Mukurarinda yavuze ko abandi biganjemo abanyeshuri babashije guhungira mu bindi bihugu bavuye muri Ukraine, kandi leta irimo gukora ibikorwa bigamije kubacyura.
Ibi bibaye nyuma y'amashusho yabonetse ku mbuga nkoranyambaga arimo kuvangura abirabura n'abazungu mu guhunga Ukraine.
Bamwe bavuze ko babujijwe kurira imodoka na gariyamoshi zibavana mu mijyi ya Ukraine yatewe, cyangwa bagasabwa gutegereza ku mipaka mu gihe abandi (batari abanyafurika) bo bambuka.
Ubumwe bwa Africa bwamaganye uko bafashwe
Umuryango w'Ubumwe bwa Africa (AU) wamaganye uko abanyafrika barimo kugerageza kuva muri Ukraine bafatwa.
Itangazo ry'uyu muryango ryo kuwa mbere nijoro rivuga ko kurobanura abanyafurika ari igikorwa kibabaje cy'irondaruhu kinyuranyije n'amategeko mpuzamahanga.
Ryongeraho ko abantu bose bafite uburenganzira bungana mu kwambuka imipaka mpuzamahanga mu gihe cy'intambara, hatitawe ku bwoko cyangwa uruhu rwabo.
Mu minsi micye ishize, ibihumbi by'abanyafurika, biganjemo abanyeshuri, babashije kwambuka imipaka ya Ukraine bajya mu bihugu nka Pologne, Hungary n'ahandi muri ako karere, mu gihe bamwe muri bo barimo kugerageza gusubira mu bihugu byabo.
