Covid: Ikipe y'igihugu ya Eritrea ntizitabira Tour du Rwanda kuko batakingiwe

Inyandiko gusa
Abakinnyi b'ikipe ya Eritrea muri UCI Road World Championships i Leuven mu Bubiligi umwaka ushize, Biniam Girmay (wa kabiri ibumoso), Henok Mulubrhan (wa kabiri iburyo) na Natnael Tesfazion (ubanza iburyo), bari bari mu bitezwe cyane mu Rwanda

Ahavuye isanamu, Getty Images

Insiguro y'isanamu, Abakinnyi b’ikipe ya Eritrea muri UCI Road World Championships i Leuven mu Bubiligi umwaka ushize, Biniam Girmay (wa kabiri ibumoso), Henok Mulubrhan (wa kabiri iburyo) na Natnael Tesfazion (ubanza iburyo), bari bari mu bitezwe cyane mu Rwanda

Ikipe y'igihugu ya Eritrea yo gusiganwa ku igare ntabwo izitabira Tour du Rwanda y'uyu mwaka kuko abayigize batujuje ibisabwa mu kwirinda Covid, nk'uko ishyirahamwe ry'umukino w'amagare mu Rwanda (FERWACY) ribivuga.

Ikipe ya Eritrea ni imwe mu zifite abakinnyi bakomeye bahabwaga amahirwe muri iri siganwa mpuzamahanga rizatangirira i Kigali mu kwezi gutaha.

Murenzi Abdallah ukuriye FERWACY yabwiye BBC ko ibi bitewe n'amabwiriza yo kwirinda Covid yashyizweho, no "ku mirongo migari tuba twahawe n'ishyirahamwe ry'umukino w'amagare ku rwego rw'isi".

Eritrea na Korea ya Ruguru ni byo bihugu ku isi bitarashyiraho uburyo bwo gukingira Covid abaturage babyo.

Amakuru agera kuri BBC avuga ko mu basiganwa ku igare nta mukinnyi n'umwe wa Eritrea mu bakina imbere mu gihugu cyabo wakingiwe.

Murenzi avuga ko yaba abakinnyi, abatoza, n'abandi bose bazaba bari mu bikorwa bya Tour du Rwanda uyu mwaka, "uzitabira agomba kuba afite inkingo zombi".

Ati: "Uretse no mu magare, no mu bindi bikorwa bitandukanye mu gihugu cyacu ahantu hahurira abantu benshi utarakingiwe ntabwo twakwemera ko uza kwanduza abandi."

"Dushyiraho amabwiriza, uyujuje akaza, utayujuje ntitumwemerera. Bivuze rero ngo umuntu we ni we ufata icyemezo akavuga ati 'nkurikije aya mabwiriza mwashyizeho ntabwo nzitabira kuko ibi mwakoze ntabyujuje'".

Skip Ibisomwa cane and continue reading
Ibisomwa cane

End of Ibisomwa cane

Abakinnyi b'Abanya-Eritrea bamaze gutwara Tour du Rwanda inshuro eshatu (2010, 2019 na 2020), kabiri bari kumwe n'ikipe y'igihugu na rimwe (2019) umukinnyi ari mu ikipe itari iy'igihugu.

Biniam Girmay yitwaye neza ubow aheruka gusiganwa mu Rwanda

Ahavuye isanamu, AFP

Insiguro y'isanamu, Biniam Girmay yitwaye neza ubwo aheruka gusiganwa mu Rwanda

Merhawi Kudus wegukanye Tour du Rwanda ya 2019, Natnael Tesfatsion wegukanye iya 2020, Biniam Girmay wabaye umukinnyi mwiza w'umunyafrika muri iyi Tour ya 2020, n'abandi nka Henok Mulubrhan na Dawit Yemane ni bamwe mu bihangange byari byitezwe guhagararira Eritrea.

Murenzi avuga ko kuba ikipe ya Eritrea itazaza bitazahungabanya guhatana gukomeye kurangwa muri iri siganwa kuko hari n'andi makipe akomeye yo ku rwego rw'isi azaza.

Yongeraho ati: "Nubwo Eritrea izaba idahari nk'igihugu, dushobora kubona bamwe mu bakinnyi baho bashobora kuza bakinira andi makipe yujuje ibisabwa, kuko bagira ababigize umwuga benshi kandi bikingije."

Tour du Rwanda ku nshuro ya 14 izatangira tariki 20 Gashyantare (Ruhuhuma mu Kirundi), aho abasiganwa bazanyura mu mihanda migari yo mu ntara enye z'u Rwanda.

Iri rushanwa umwaka ushize ryegukanywe na Cristián Rodríguez, Umunya-Espagne wakiniraga ikipe ya TotalEnergies yo mu Bufaransa.