Ethiopia – Tigray: Biden ahangayikishijwe n'iyicwa ry'abasivile
Ahavuye isanamu, Getty Images
- Umwanditsi, Will Ross
- Igikorwa, Umwanditsi mukuru kuri Afurika, Ishami ry'Isi rya BBC
Mu kiganiro kuri telefone yagiranye na Minisitiri w'intebe Abiy Ahmed, Perezida w'Amerika Joe Biden yavuze ko ahangayikishijwe n'impfu z'abaturage b'abasivile zatewe n'ibitero by'indege biherutse kuba muri Ethiopia.
Ibi bikurikiye amakuru avuga ko abantu barenga 50 bakuwe mu byabo n'intambara, ku wa gatanu biciwe mu gitero cy'indege mu majyaruguru ashyira uburengerazuba bw'akarere ka Tigray kari mu majyaruguru ya Ethiopia.
Itangazo ryasohowe n'ibiro bya Perezida w'Amerika, White House, rivuga ko Perezida yishimiye ifungurwa ry'abakuru bo mu batavuga rumwe n'ubutegetsi, ndetse asezeranya umusanzu we mu kugera ku isozwa rinyuze mu mahoro ry'intambara hagati y'ingabo za leta n'inyeshyamba zo muri Tigray.
Umubano hagati y'Amerika na Ethiopia umaze igihe urimo agatotsi, leta ya Ethiopia ikaba itishimiye kuba ikomeje kunengwa guhonyora uburenganzira bwa muntu muri iyi ntambara imaze amezi 14 irwana n'inyeshyamba zo muri Tigray.
No kuba Bwana Biden na Bwana Abiy bagiranye ikiganiro kuri telefone, byo ubwabyo bishobora kuba ari ikimenyetso cy'intambwe irimo guterwa.
Itangazo rya White House rivuga ko abategetsi bombi baganiriye ku bijyanye no kwihutisha ibiganiro byerekeza ku gahenge.
Rinavuga ko ari intambwe nziza kuba abakuru bo mu batavuga rumwe n'ubutegetsi baherutse kurekurwa. Ariko ingingo ijyanye n'ubwicanyi ndengakamere yongeye gukomozwaho.
