Covid: Igihugu gifite amabiwiriza akarishye ku batarakingiwe

Carina, umwalimu wa Yoga i Vienne, ntabwo yakingiwe Covid-19 kandi ntabishaka.

Ubu rero ategetswe kuguma mu rugo, kimwe n'abandi bantu bagera kuri miliyoni ebyiri muri Autriche batarakingirwa.

Yemerewe gusohoka iwe ku mpamvu zikomeye gusa, nko mukazi cyangwa guhaha ibyo kurya, ntagomba kugera muri za restaurants na za café.

Twahuriye muri parike mu murwa mukuru wa Autriche, Vienne, aho yemerewe gukorera imyitozo ngororamubiri.

Carina avuga ko atumva impamvu yo kubuzwa ubwo burenganzira, kandi ibyo bimubabaje.

Ati: "Mu gitondo naciye imbere ya café, ni ibintu bibabaje kuhareba ariko ntemerewe kuhinjira. Twumva twarahejwe."

Arasobanura ati: "Sinifuza ko abantu barwara. Ndirinda, nkisuzumisha. Ntabwo nishyira mu kaga kandi nibaza ko ari icyemezo bwite cyane. Abikingiza ndabumva kimwe n'abatikingiza."

Mu bice bitandukanye by'iki gihugu habaye imyigaragambyo yo kwamagana uku gushyira mu kato abatarakingiwe.

Polisi yatangaje ko igiye gutangira igenzura rusange ahahurira abantu benshi kandi izaca amande umuntu wese utagaragaza icyangombwa ko yakingiwe.

Abagera kuri 65% batuye Autriche barakingiwe byuzuye, kimwe mu bipimo bito mu Burayi bw'uburengerazuba.

Iki gihugu ubu gifite umubare munini w'abandura Covid ku munsi kuva iki cyorezo cyahagera.

Ku mutegetsi mukuru wacyo, chancelier Alexander Schallenberg, leta irasabwa kugira icyo ikora kuri ubu bwiyongere bushya bw'abandura.

Avuga ko igipimo cy'abakingiwe "kiri hasi biteye isoni" kandi "bizaduheza mu ruhererekane rutarangira rwa guma mu rugo ivaho haza indi."

Kuva hakomezwa ingamba, abanya-Autriche bagiye bitabira gukingirwa kurushaho. Imirongo miremire iraboneka aho bakingirira muri Vienne. Bamwe gufata doze ya mbere abandi iya kabiri.

Dr Thomas Szekeres, ukuriye urwego rw'abaganga muri Autriche, yizeye ko igipimo cy'abakingiwe vuba kizagera kuri 80% no hejuru.

Ati: "Tuzi ko gukingira aribwo buryo bwonyine bwo kugabanya iki cyorezo. Twarabibonye mu bindi bihugu.

"Twizeye ko kugumisha mu rugo abatarakingiwe bizaba bihagije kugabanya ubwandu. Ariko inzobere ntabwo zibyizeye neza. Birashoboka ko twakenera ingamba zisumbuyeho kugira ngo tubashe kugabanya neza ubwandu."

Abantu benshi muri Autriche bishimiye kwiyongera kw'abakingirwa, ariko bamwe bavuga ko guheza mu ngo abatarakingiwe binyuranyije n'itegeko nshinga.

Karl Weller, umucuruzi w'i Vienne, avuga ko ashyigikiye cyane urukingo, kuko "ari ingenzi ku buzima bwacu n'ubukungu bwacu."

Yongeraho ati: "Ariko ntekereza ko ari akaga gutandukanya abakingiwe n'abatarakingiwe. Abantu batangiye kurakara cyane kandi bafite ubwoba."

Kugura imyenda n'ibindi bintu bitari iby'ibanze ubu ntabwo bishoboka uretse ku bantu bakingiwe.

Bamwe baravuga ko iki cyemezo kirimo guhonyora uburenganzira bw'ibanze bwa rubanda.

Doris, wari wasohokeye hagati muri Vienne, avuga ko atabasha kumva abantu badashaka kwikingiza.

Ati: "Igisubizo cyonyine ni uko twese dukingirwa. Nicyo cyonyine. Bitabaye ibyo, dufite ikibazo mu gihe kirekire. Kandi rwose turashaka ko kirangira."