Saif al-Islam Gaddafi: Umuhungu w'uwari umutegetsi wa Libya yiyamamarije kuba Perezida
Ahavuye isanamu, AFP
Umuhungu w'uwahoze ari umutegetsi wa Libya Muammar al-Gaddafi yatanze kandidatire ye mu matora ya perezida ya mbere ataziguye muri iki gihugu ateganyijwe kuba mu kwezi gutaha.
Saif al-Islam Gaddafi yigeze kuba abonwa nk'uwari gusimbura se ku butegetsi, ariko kuba mu myaka 10 ishize yarashyigikiye itoteza ririmo urugomo ryakorewe abigaragambya byahindanyije isura ye mu gihugu.
Kuva haba iyo myivumbagatanyo yo mu 2011, Libya yakomeje kurangwamo umutekano mucye.
Imiryango iharanira uburenganzira bwa muntu yagaragaje impungenge ifite ko ayo matora, ateganyijwe kuba ku itariki ya 24 y'ukwezi kwa cumi na kabiri, atazaba mu bwisanzure no mu mucyo.
Ibihugu bikomeye ku isi ndetse n'umunyamabanga mukuru w'umuryango w'abibumbye (ONU/UN) baburiye ko uwo ari we wese wagerageza kubangamira cyangwa gukora uburiganya muri ayo matora azafatirwa ibihano.
Amafoto na videwo birimo guhererekanywa ku mbuga za internet bigaragaza Saif al-Islam Gaddafi yicaye imbere y'ikirango kivuga ku matora yimirije, ashyira umukono ku mpapuro z'amatora.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
BBC ntibazwa ibivuye ku zindi mbuga.
Ateretse ubwanwa anambaye imyambaro gakondo yo muri Libya, yavugiye kuri 'camera' asubiramo umurongo wo mu gitabo cya Korowani (Koran), uwusemuye mu Kinyarwanda uvuga ngo "umucamanza hagati yacu n'abantu bacu mu kuri".
Asubiramo amagambo yo mu kindi gice cyo muri icyo gitabo gitagatifu cy'abayisilamu, yanavuze ati: "Imana buri gihe irigaragaza mu mugambi wayo", yongeraho andi magambo yo mu kindi gice, ati: "N'iyo abatemera bawanga".
Ni ishusho itandukanye cyane n'iyo yagaragaje mbere y'imyivumbagatanyo yakuye se ku butegetsi mu 2011.
Nyuma yuko Muammar Gaddafi akuwe ku butegetsi yishwe, Saif al-Islam Gaddafi na we yafashwe n'umutwe w'intagondwa.
Yafunzwe mu gihe cy'imyaka itandatu, ahabwa igihano cy'urupfu nyuma kiza gukurwaho.
Bwana Gaddafi aracyashakishwa n'urukiko mpuzamahanga mpanabyaha (ICC/CPI) ku byaha byo mu ntambara, ariko gahoro gahoro yagiye yongera kwigaragaza, harimo no mu kiganiro yagiranye mu kwezi kwa karindwi uyu mwaka n'ikinyamakuru The New York Times ari mu nyubako ye iri mu mujyi wa Zintan.
Muri Libya baracyibuka cyane ibyabaye kuburyo atakwizera gutsindira kuba Perezida, nkuko bivugwa n'umwanditsi mukuru wa BBC ku karere k'uburasirazuba bwo hagati Sebastian Usher, ndetse kandidatire ye izarushaho guteza ibibazo mu gikorwa cy'amatora cyari gisanzwe gifite intege nkeya.
Abandi bakandida barimo nk'uwari umukuru w'inyeshyamba Khalifa Haftar, mbere wayoboye inyeshyamba afite icyicaro mu burasirazuba arwanya leta ishyigikiwe na ONU yo mu murwa mukuru Tripoli, hamwe na Minisitiri w'intebe Abdulhamid al-Dbeibah n'umukuru w'inteko ishingamategeko Aguila Saleh.
