Uganda – Museveni: Ba perezida 11 bo muri Africa bitabiriye kurahira kwe

Inyandiko gusa
Perezida w'u Burundi yageze i Kampala ku gicamunsi kuwa kabiri aho we yaje mu ruzinduko rw'iminsi itatu

Ahavuye isanamu, Twitter/Yoweri Museveni

Insiguro y'isanamu, Perezida w'u Burundi yageze i Kampala ku gicamunsi ku wa kabiri aho we yaje mu ruzinduko rw'iminsi itatu

Perezida Yoweri Museveni wa Uganda ararahirira manda ya gatandatu izatuma amara imyaka 40 ku butegetsi, mu birori byitabiriwe n'abantu barenga 4,000 barimo abaperezida 11 b'ibihugu bya Africa.

Abakuru b'ibihugu bya Somalia, Burundi, South Sudan, Namibia, Zimbabwe, Guinea, Ghana, DR Congo na Ethiopia ejo ku wa kabiri bageze muri Uganda baje muri uwo muhango.

Perezida Samia Suluhu wa Tanzania na Uhuru Kenyatta wa Kenya nabo bageze i Kampala mu gitondo kuwa gatatu kwitabira ibi birori.

Perezida w'u Rwanda - utabanye neza na mugenzi we wa Uganda - yohereje Prof. Manasseh Nshuti ushinzwe umuryango w'ibihugu bya Africa y'i burasirazuba (EAC) kumuhagararira.

Mu kiganiro n'abanyamakuru, Hajji Yunus Kakande, umunyamabanga wa Museveni, yavuze ko abantu 4,294 batumiwe aho ibi birori bibera kuri Kololo Independence Grounds i Kampala.

Bwana Kakande yavuze ko abo bose babanje gupimwa Covid-19, nk'uko bivugwa n'ikinyamakuru New Vision kibogamiye kuri leta.

Museveni ku nshuro ya karindwi

Imibare ya 2019 yerekana ko hejuru ya kimwe cya kabiri cy'abaturage miliyoni 45 ba Uganda bavutse Museveni ari ku butegetsi.

Uhereye bwa mbere tariki 29/01/1986, 1996, 2001,2006,2011 na 2016, uyu munsi Yoweri Museveni ararahira ku nshuro ya karindwi kuyobora Uganda, indi manda y'imyaka itanu izamugeza mu 2026.

Skip Ibisomwa cane and continue reading
Ibisomwa cane

End of Ibisomwa cane

Perezida Museveni n'umugore we Janet Museveni baraye bakiriye abashyitsi bakomeye bahageze, ubanza ibumoso ni Perezida Nana Akufo-Addo wa Ghana

Ahavuye isanamu, Twitter/Yoweri Museveni

Insiguro y'isanamu, Perezida Museveni n'umugore we Janet Museveni baraye bakiriye abashyitsi bakomeye bahageze, ubanza ibumoso ni Perezida wa Ghana Nana Akufo-Addo

Ikinyamakuru kitabogamiye kuri leta Daily Monitor cyasubiyemo amagambo mu 1980, 1986, 2001 cyangwa 2016, y'uburyo yagiye ahindura imvugo ku gutinda ku butegetsi.

Iki kinyamakuru kivuga ko mu 1986 yagize ati: "Ikibazo cya Africa muri rusange, na Uganda by'umwihariko, si rubanda ahubwo abategetsi bashaka gutinda ku butegetsi."

Iki kinyamakuru gisubiramo kandi ibyo yavuze mu kwiyamamaza mu 2016 aho yagize ati: "Ni gute nava mu rutoki nahinze mu gihe rutangiye kwera?"

Abatavuga rumwe n'ubutegetsi bwe baranenga ingufu ubu ziri gukoreshwa mu kubibasira, Bobi Wine wabaye uwa kabiri we akomeza kuvuga ko ari we watsinze amatora yabaye mu kwa mbere.

Umunyabanga wa UN, Antonio Guterres, yoherereje Perezida Museveni ubutumwa bwo kumushimira ko agiye kongera kurahira, nk'uko bwatangajwe n'uhagarariye Uganda muri UN/ONU.

Yunus Kakande we yabwiye abanyamakuru ko leta yohereje abashinzwe umutekano bahagije bo "guhangana n'igikorwa cyose cyagerageza guhungabanya ibirori" by'uyu munsi.

Perezida Samia Suluhu wa Tanzania ageze i Kampala mu irahira rya Perezida Museveni

Ahavuye isanamu, Twitter/Yoweri Museveni

Insiguro y'isanamu, Kuwa gatatu mu gitondo Perezida Samia Suluhu wa Tanzania ageze i Kampala mu irahira rya Perezida Museveni