Ashli Babbitt: Yari yavuye muri leta ya California aje i Washington DC kwigaragambya

Umunsi ubanziriza uwo yapfuyeho,Ashli Babbitt yari yanditse ku mbunga nkoranyambaga ku myigaragambyo y'abashyigikiye Trump bari bukorere i Washington DC.

Ati: "Ntakiri buduhagarike. Bashobora kugerageza ariko turamanutse ikivunge kandi turagwa kuri DC mu masaha atarenze 24."

Babbit yari afite imyaka 35, yari mu bantu benshi bateye ku nyubako ya US Capitol kuwa gatatu nimugoroba. Polisi yavuze ko ari umwe mu bantu bane bahasize ubuzima.

Babbit yahoze mu ngabo zirwanira mu kirere, yagiye kurwana inshuro ebyiri muri Iraq na Afghanistan nyuma yoherezwa muri Kuwait na Qatar nk'uko uwahoze ari umugabo we Timothy McEntee yabitangaje.

Uyu mugore wavukiye San Diego muri leta ya California yari aherutse gushaka undi mugabo, ndetse yakoranaga n'uwo mugabo we Aaron Babbit.

Ku mbuga nkoranyambaga, Babbit yiyitaga umuntu ukunda igihugu. Yashyigikiraga cyane Perezida Donald Trump akanashimangira ko yibwe amajwi mu matora.

Uwari umugabo we McEntee yabwiye ikinyamakuru NPR ati: "Yari afite imiterere wahitamo gukunda cyangwa ukanga. Byamuteraga ishema, nk'uko yaterwaga ishema no kuba Umunyamerika."

Mbere y'imyigaragambyo yari yatangaje kuri Twitter ko azaba ari i Washington mu myigaragambyo bise iyo "guhagarika ubujura".

Yaranditse ati: "Tariki 06 nzaba ndi DC. Imana ihe umugisha Amerika na WWG1WGA".

Ayo magambo y'impine ni akoreshwa n'abemera inkubiri yitwa QAnon bizera ko Trump ari umuntu udasanzwe uri ku ntambara itaboneshwa amaso arwana n'abantu ba Satan n'abasambanya abana.

Nyirabukwe, Robin Babbit, yabwiye Fox News ko umuhungu we atajyanye n'umugore we i Washington mu myigaragambyo.

Ati: "Sinzi impambu mu by'ukuri yahisemo kujya muri biriya".

Bikekwa ko Babbit yafashwe n'amasasu y'abapolisi barashe ku kivunge cy'abantu bariho binjira ku ngufu muri iriya nzu ikoreramo inteko ishingamategeko ya Amerika.

Mu mashusho yafashwe hari umugore uboneka yurira hafi y'umuryango ngo yinjire. Ako kanya hahita humvikana urusaku, amashusho amugaragaza yitura hasi.

Polisi icunga iyi nzu, yatangaje ko barashe ku mugore ubwo "abigaragambya bariho binjira ku ngufu mu cyumba abadepite bari bateraniyemo".

Babbit yajyanywe kwa muganga nyuma yo kuraswa ariko uwo mugoroba arapfa nk'uko polisi ibivuga. Umupolisi wamurashe ntiyatangajwe ariko yahise ashyirwa mu kirihuko.

Nyirabukwe yavuze ko bababajwe cyane n'iyi nkuru, ariko birenzeho ati: "Nta muntu numwe i Washington wabwiye umuhungu wanjye, twabibonye kuri Televiziyo."

Abandi bantu batatu nabo bari bakoze urugendo baza i Washington kwigaragambya baguye muri iyi myigaragambyo nk'uko polisi ibivuga, nta makuru arambuye kuri bo yatanzwe.

Polisi yatangaje gusa ko abo ari Benjamin Phillips, 50, w'i Pennsylvania; Kevin Greeson, 55, w'i Atlanta na Rosanne Boyland, 43, w'i Georgia.

Abapolisi 14 barinda inzu ya Capitol nabo barakomeretse nk'uko babitangaje.