Julian Assange wa Wikileaks: Umucamanza i London yategetse ko atoherezwa muri US

Inyandiko gusa
Ifoto Assange yafotowe umwaka ushize mu kwa mbere avuye mu rukiko

Ahavuye isanamu, Reuters

Insiguro y'isanamu, Ifoto Assange yafotowe umwaka ushize mu kwa mbere avuye mu rukiko

Julian Assange washinze urubuga Wikileaks ntashobora kohererezwa Leta zunze ubumwe za Amerika nk'uko byategetswe n'urukiko rw'i London.

Umucamanza yatambamiye ubusabe bwa Amerika ashingiye ku mpamvu z'ubuzima bwo mu mutwe bwa Assange n'ibyago byo kuba yakwiyahura ageze muri Amerika.

Uyu mugabo w'imyaka 49 arashakishwa kubera gutangaza inyandiko ibihumbi mirongo z'amabanga hagati ya 2010 na 2011.

Amerika ivuga ko yishe amategeko akanashyira ubuzima bw'abantu mu kaga. Assange aranga koherezwa muri Amerika, avuga ko urubanza rwe rufite imvo za politiki.

Uruhande rw'abashinjacyaha muri Amerika rufite iminsi 14 yo kujurira, ibintu byitezwe cyane ku bazakora.

Assange ubu ufungiye muri gereza, kuwa gatatu uruhande rwe ruzasaba ko arekurwa agakurikiranwa adafunze.

Umucamanza Vanessa Baraitser uyu munsi kuwa mbere yavuze ko Abashinjacyaha ba Amerika baterekanye ko aramutse afungiweyo yarindwa kwiyahura, ibintu ngo biri mu bitekerezo bye.

Umukunzi wa Julian Assangie, Stella Moris, hamwe n'umuvugizi wa WikiLeaks Kristinn Hrafnsson (ibumoso) bageze ku rukiko kumva umwanzuro

Ahavuye isanamu, PA Media

Insiguro y'isanamu, Umukunzi wa Julian Assangie, Stella Moris, hamwe n'umuvugizi wa WikiLeaks Kristinn Hrafnsson (ibumoso) bageze ku rukiko kumva umwanzuro

Mu rukiko uyu munsi, Assange yahumirije afunga amaso ubwo umucamanza yari atangiye kuvuga umwanzuro w'urukiko.

Skip Ibisomwa cane and continue reading
Ibisomwa cane

End of Ibisomwa cane

Mu rukiko, umukunzi we Stella Moris, bafitanye abana babiri, yarize ahozwa n'umwanditsi mukuru wa Wikileaks wari umwicaye iruhande.

Ahamijwe ibyaha muri Amerika yakatirwa gufungwa imyaka 175 nk'uko abanyamategeko be babivuga. Gusa leta ya Amerika yo ivuga ko yafungwa imyaka hagati y'ine n'itandatu.

Amerika imushinja kwiba inyandiko z'ibanga ku byabaye mu ntambara za Afghanistan na Iraq mu bushyinguranyandiko bw'ikoranabuhanga bw'ingabo za Amerika, akazitangaza kuri Wikileaks.

Umunya-Australia Julian Assange avuga ko amakuru yatangaje agaragaza ibikorwa bibi byakozwe n'ingabo za Amerika.

Abashinjacyaha muri Amerika bo bavuga ko amakuru yatangaje yashyize ubuzima bw'abantu mu kaga, bagasaba ko Ubwongereza bumwohereza kuburanira muri Amerika.

Abashyigikiye Assange bamwe bari baje ku rukiko mu gitondo uyu munsi kuwa mbere

Ahavuye isanamu, PA Media

Insiguro y'isanamu, Abashyigikiye Assange bamwe bari baje ku rukiko mu gitondo uyu munsi kuwa mbere

Mu kwezi kwa gatanu 2019 Assange yakatiwe gufungwa ibyumweru 50 kubera kurenga ku mabwiriza yo kurekurwa by'agateganyo ubwo yajyaga kwihisha muri Ambasade ya leta ya Equateur i London.

Yabaye mu buhungiro muri iyi Ambasade mu gihe cy'imyaka irindwi kuva mu 2012 kugeza atawe muri yombi mu kwezi kwa kane 2019.

Ubwo yahungiraga muri iyi Ambasade, yatinyaga koherezwa muri Sweden aho yaregwaga ibyaha byo gufata ku ngufu, ibyaha we yahakanye. Icyo kirego cyaje guhebwa.