Covid: Ubukungu bw'Ubushinwa buzaba bwaraciye kubw'Amerika mu 2028

Bizagera mu 2028 Ubushinwa bwaraciye kuri Leta zunze ubumwe za Amerika aribwo buri imbere mu bukungu ku isi nk'uko raporo mu by'imari ibigaragaza.

Raporo y'ikigo Centre for Economics and Business Research (CEBR) ivuga ko "ubuhanga bukomeye" bw'Ubushinwa mu guhangana na Covid-19 buzazamura ubukungu bwabo ugereranyije na Amerika n'Uburayi mu myaka iri imbere.

Hagati aho, iyi raporo iteganya ko bizagera mu 2030 Ubuhinde ari igihugu cya gatatu gukomeye mu bukungu ku isi.

CEBR isohora raporo yayo buri mwaka tariki 26/12, inshya irerekana ko Ubushinwa buzaca kuri Amerika mbere ho imyaka itanu ku gihe cyari giteganyijwe mbere.

Nubwo Ubushinwa ari cyo gihugu cya mbere cyagezweho na Covid, bwabashije guhashya iki cyorezo vuba kubera ingamba zikakaye n'ibikoresho bihagije.

Ibyo byatumye ubukungu bw'Ubushinwa budahungabana ugereranyije n'ibindi bihugu bikomeye, ndetse biteganyijwe ko uyu mwaka ubukungu bwabo buzamuka ku gipimo cya 2%.

Ku rundi ruhande, uko coronavirus yazahaje Amerika kurusha ibindi bihugu ku isi, ni nako ubukungu bwayo bwahababariye bikomeye.

Amerika yaranzwe n'ibibazo muri politiki y'idorari n'igabanuka rikomeye ry'imisoro, gusa kutumvikana muri politiki byazahaje iki gihugu kurushaho.

Biteganyijwe ko politiki `nshya ya Amerika yo kuzahura ubukungu ishobora gutuma Abanyamerika miliyoni 14 badafite akazi batazabona inkunga ibabeshaho mu mwaka mushya.

Raporo ya CEBR ivuga ko "hashize igihe hari isiganwa mu bukungu hagati ya Amerika n'Ubushinwa. Gusa icyorezo cya Covid-19 cyagushije ubukungu mu buryo buha amahirwe Ubushinwa".

CEBR ivuga ko nyuma yo "guhaguruka gukomeye nyuma y'icyorezo mu 2021" ubukungu bwa Amerika buzazamuka kuri 1.9% buri mwaka kuva mu 2022-24, nyuma bumanuke kuri 1.6% mu myaka izakurikiraho.

Ku rundi ruhande ubukungu bw'Ubushinwa biteganyijwe ko buzazamuka ku kigero cya 5.7% buri mwaka kugeza mu 2025, na 4% buri mwaka kuva mu 2026-2030.

Umugabane w'Ubushinwa mu bukungu bw'isi warazamutse uva kuri 3.6% mu 2000 ubu ugeze kuri 17.8% kandi kugeza mu 2023 Ubushinwa buzaba aricyo gihugu "cyinjiza imari nini" nk'uko iyi raporo ibivuga.

Ntabwo Ubushinwa bwungukiye mu gutsinda Covid-19, ahubwo ni muri politiki yibanda ku nganda zikora ibicuruzwa byinshi nk'uko Douglas McWilliams umuyobozi wungirije wa CEBR.

Yabwiye BBC ati: "Baboneka nk'abafite ubucuruzi bugenzuwe ku ruhande rumwe ariko nanone bufunguye cyane ku rundi ruhande, ubwo bucuruzi bufunguye bwatumye bihuta cyane cyane mu by'ikoranabuhanga".

Gusa no mu gihe igihugu cye kizaba cyaraciye kuri Amerika umuturage w'Umushinwa azakomeza kuba umukene muri rusange ugereranyije n'umuturage wa Amerika, cyane ko abatuye Ubushinwa baruta Abanyamerika inshuro enye.

Mu bindi iyi raporo iteganya: