Brexit: Ishirahamwe EU ritegura iki mu gihe ibiganiro vyokwanka?
Ahavuye isanamu, PA Media
Ishirahamwe ry'Ubumwe bw'ibihugu vya Buraya , EU, ryashize ahabona integuro yihuta mu gihe ibiganiro ku bijanye n'ubucuruzi n'Ubwongereza muri wa mugambi w'iki gihugu wo kwiyonkora muri uyo muryango, Brexit, vyokwanka.
Iyi nteguro ifise intumbero yo kwemeza uburyo bw'ibanze bw'ukungene hobaho amabarabara n'ikirere bihuza Ubwongereza n'Uburayi, hamwe n'ingene uruhande rumwe rumwe rwogira uburenganzira bwo kuroba mu mazi y'urundi ruhande.
Iyi nteguro ije inyuma y'aho ibiganiro hagati y'umushikiranganji wa mbere w'Ubwongereza, Boris Johnson, n'umukuru w'umuryango w'Ubumwe bw'ibihugu vya Buraya, Ursula von der Leyen, vyo kuraba ingene bokuraho inzitizi birangiriye ata masezerano bashitseko.
Vyitezwe ko Ubwongereza buhagarika amasezerano ajanye n'ubudandaji hagati y'ibihugu bigize iri shirahamwe ku wa 31 z'uku kwezi kwa cumi na kabiri 2020.
Ubwongereza bwavuye muri iryo shirahamwe mu mpera z'ukwa mbere 2020, ariko hakaba hakurikiye ikiringo mfatakibanza c'amezi 11 kugira ngo izi mpande zibiri zije mu biganiro vyo kuraba ingene boshika ku masezerano.
Ibi biganiro birabandanya ariko inyuma y'umubonano wo kuri uyu wa gatatu hagati y'aba bategetsi babiri, reta y'Ubwongereza yatangaje ko "hakiri ibihengeri binini cane".
Umunyamabanga w'Ubwongereza ajejwe imigenderanire n'ayandi makungu, Dominic Raab, avuga ko bisa "n'ibidakunda" ko ibi biganiro bishobora kubandanya inyuma yo ku wa Mungu.
