Kurasana i Vienna: Autriche irimo guhiga abacyekwa nyuma y''igitero cy'iterabwoba'

Abagabo bitwaje imbunda barashe ahantu hatandatu hatandukanye mu murwa mukuru Vienne wa Autriche (Austria) bica abantu bane nkuko polisi ibivuga.

Abandi bantu 17 bakomeretse, bamwe muri bo mu buryo bukomeye.

Abategetsi bavuze ko umwe mu bagabye igitero yishwe arashwe na polisi.

Abantu benshi batawe muri yombi nyuma yo gusaka ingo zegereye aho byabereye, barimo na babiri bacyekwaho kuba mu bagabye icyo gitero.

Leta ya Autriche yatangaje igihe cy'icyunamo cy'iminsi itatu mu gihugu hose, cyahise gitangira ako kanya.

Karl Nehammer, Minisitiri w'ubutegetsi bw'igihugu wa Autriche, yavuze ko uwo wishwe arashwe mu bateye ari "umuterabwoba wo muri Isilamu ugendera ku mahame y'ubuhezanguni".

Babiri muri abo bapfuye mu kurasa nta kurobanura ni abagore, naho abandi babiri ni abagabo.

Amakuru avuga ko umwe mu bagore yakoraga akazi ko gutanga ibiribwa n'ibinyobwa. Umugore wa kabiri yapfiriye mu bitaro nijoro azize ibikomere by'amasasu.

'Chencelier' wa Autriche Sebastian Kurz yavuze ko ari "igitero giteye umujinya cy'iterabwoba".

Polisi ya Autriche irimo guhiga abacyekwaho kuba mu bagabye icyo gitero.

Uko kurasana kwabereye hafi y'urusengero ruri rwagati mu mujyi wa Vienne, ariko ntabwo biramenyekana niba ari rwo rwari rugambiriwe.

Iki gitero cyabaye habura amasaha ngo Autriche itangire gukurikiza amabwiriza mashya yo kugerageza kugabanya kwiyongera k'ubwandu bwa Covid-19.

Abantu benshi bari basohotse bifata neza mu tubari no muri za 'restaurants', ubu byamaze gufungwa kugeza mu mpera y'uku kwezi kwa 11.

Abategetsi b'i Burayi bamaganye bikomeye icyo gitero. Barimo nka Minisitiri w'intebe w'Ubwongereza Boris Johnson wavuze ko "ababajwe bikomeye" n'icyo gitero.

Icyo tuzi kuri iki gitero

Polisi yavuze ko cyatangiye hafi saa mbiri z'ijoro (20h) ku isaha y'i Vienne ejo ku wa mbere, hafi y'urusengero rwa Seitenstettengasse.

Umugabo witwaje intwaro nyinshi yarashe mu bantu bari bari hanze y'inzu zicururizwamo ibiribwa n'ibinyobwa byoroheje (cafés) n'imbere ya za 'restaurants'.

Abo mu itsinda kabuhariwe rya polisi ya Autriche bahise bahagera.

Umupolisi umwe yakomeretse, mbere yuko abandi bapolisi barasa uwagabye icyo gitero, wari witwaje imbunda irasa idahagarara, afite n'imbunda nto n'umuhoro.

Oskar Deutsch, ukuriye abayahudi, yanditse kuri Twitter ko urwo rusengero rwari rufunze ubwo icyo gitero cyatangiraga.

Umupolisi wari urinze urwo rusengero ari mu bakomeretse, nkuko bitangazwa n'ikinyamakuru Kronen Zeitung.

Umubare w'abagabye icyo gitero ntabwo wahise umenyekana.

Amashusho yatangajwe ku mbuga nkoranyambaga agaragaza abantu birukanka mu mihanda ubwo amasasu yavugaga.

Ubwo igikorwa cya polisi cyo kurwanya iterabwoba cyari gitangiye, abapolisi basabye abantu kwirinda kugera aho byabereye no kutagenda mu buryo bwo gutwara abantu bwa rusange.

Hahise hashyirwa za 'barrières' ahakikije umujyi rwagati.

Polisi yo mu gihugu gituranyi cya République tchèque yavuze ko irimo gukora amasaka ku mupaka gihana na Autriche, mu gihe hari ubwoba ko uwo mugabo witwaje intwaro ashobora kuherekeza.

Minisitiri w'ubutegetsi bw'igihugu wa Autriche Karl Nehammer yavuze ko uwagabye icyo gitero akidegembya kandi "yitwaje intwaro nyinshi" ndetse ko "ateje akaga".

Yabwiye abanyamakuru ko byitezwe ko abana b'i Vienne batari bujye ku ishuri kuri uyu wa kabiri.