Maya Moore wafashije Jonathan Irons gufungurwa ubu barashyingiwe

Maya Moore icyamamare mu mukino wa Basketball hamwe na Jonathan Irons uherutse gufungurwa muri gereza nyuma y'imyaka 23 afunze arengana, batangaje ko ubu ari umugore n'umugabo.

Mu 2019, Maya yatunguye abantu ubwo yahagarikaga gukina Basketball, kugira ngo agerageze gufunguza Jonathan. Yabigezeho mu kwezi kwa karindwi uyu mwaka.

Mu kiganiro Good Morning Amerika uyu munsi kuwa gatatu bari batumiwe bombi, bemeje ko basanze bakundana ndetse bamaze gushyingirwa.

Maya ati: "Turashaka gutangaza ko twishimiye gukomeza ibyo turi gukora hamwe, ariko tukabikorana nk'abantu bashyingiwe, turashaka gukomeza ubuzima bushya turi kumwe".

Maya Moore w'imyaka 31, kuva mu 2011 ni umukinnyi w'ikipe ya Minnesota Lynx muri WNBA, ikipe yafashije gutwara ibikombe bine bya shampiyona.

Maya avuga ko yamenye ibya Jonathan afite imyaka 18 ubwo yabwirwaga uko yafunzwe arengana, icyo gihe Jonathan akaba yari amaze imyaka irenga 10 afunze.

Ku rukundo rwabo, Jonathan yagize ati: "Mu myaka yashize ubwo yansuraga aho nari mfungiye, twaje kubona ko dufitanye ibyiyumvo bikomeye hagati yacu.

"Gukundana n'umuntu uri muri gereza ni ibintu bikomeye kandi bibabaza, sinashakaga rero ko bimubaho, ariko ubwo yariho andwanirira nageze aho mubaza nti 'uzemera ko dushyingirwa?'

"Ariko mubwira ko ntashaka igisubizo ako kanya, ko azansubiza bishobotse ko ndekurwa kuko ntawabyizeraga".

Jonathan avuga ko nyuma yo kurekurwa yaje kubona umwanya mwiza akabaza Maya cya kibazo nanone, maze Maya ntiyazuyaza amubwira, 'Yego'.

Bombi ubu bakorana ibikorwa by'ubukangurambaga ku matora, ubucamanza, politiki no gufasha abafunzwe barengana muri Amerika.

Kuri Basketball, Maya yavuze ko ubu akiri kuruhuka muri uyu mwaka wa kabiri ahagaritse gukina, nyuma yawo akazabona gutekereza niba yasubira mu kibuga.