'Inkingo ubu ni ingenzi kurusha ikindi gihe cyose' – Bill Gates
Ahavuye isanamu, Getty Images
Umuherwe w'umunyamerika Bill Gates yasabye ko urukingo (urucanco mu Kirundi) rwose rwa coronavirus rwazagerwaho rwahita "rukwirakwizwa ku isi hose".
Bwana Gates yabwiye ibi BBC mbere gato y'inama mpuzamahanga ku nkingo ihuje, ku ikoranabuhanga, abategetsi ku isi, kompanyi zikize cyane n'abantu ku giti cyabo hagamijwe gukusanya miliyari $7 yo kunganira ibikorwa byo gukora inkingo.
Iyi nama yabaye uyu munsi kuwa kane ikoranyije abantu bo mu bihugu birenga 50 byo ku isi.
Bill Gates yavuze ko inkingo "uyu munsi zikenewe kurusha ikindi gihe cyose cyabayeho", ko inkunga yose isobanuye "kurokora ubuzima".
Inkunga ikusanywa izifashishwa mu kugeza mu bihugu bikennye kurusha ibindi ku isi urukingo rwizewe rwa coronavirus ruzaba rwabonetse, no gufasha kuboneka kw'inkingo nyinshi z'indwara y'imbasa, typhoid n'iseru.
Icyorezo cya coronavirus cyahungabanyije gahunda y'inkingo ku isi, bisobanuye ko abana miliyoni 80 babuze inkingo bagombaga gufata.
Bwana Gates aburira ko amakuru y'ibihuha ku nkingo atera ibibazo umuhate wo kurwanya ibyorezo - harimo na Covid-19.
Ati: "Birumvikana ko urukingo niruboneka tuzakenera ko hakorwa rwinshi kugira ngo abarenga 80% barufate".
Yongeraho ati: "Ariko nibaba barumvise ko ari umugambi mubi cyangwa ko inkingo ari mbi, ntitugire abantu bifuza kuruhabwa ibyo bizatuma iki cyorezo gikomeza kwica abantu".
