Ubushinwa: Inteko idasanzwe yateranye, Perezida Xi nta gapfukamunwa

Uyu munsi mu Bushinwa abagize inteko ishinga amategeko bagera ku 3,000 bateranye, kimwe mu byagaragaye ni uko, bitandukanye n'abandi, Perezida Xi Jinping n'abamwegereye batari bambaye agapfukamunwa.

Stephen McDonell umunyamakuru wa BBC ukorera mu Bushinwa kuva mu 2006 avuga ko mu buryo budasanzwe uyu munsi nta banyamakuru bemerewe kugera kuri "Great Hall of the People" aho iyi nteko iteranira, kubera coronavirus.

McDonell avuga ko nubwo biboneka ko mu duce twinshi tw'Ubushinwa coronavirus yagabanutse ariko hakiri ubwoba.

Ibi ariko ntibyabujije iyi nteko, nini cyane kurusha izindi ku isi, guterana kuko yari imaze gusubikwa inshuro zirenze ebyiri muri uyu mwaka.

Coronavirus n'umubano na Amerika

Mu kuyifungura, Li Keqiang ukuriye inteko yavuze ko Ubushinwa bwateye intembwe ikomeye mu gihangana na coronavirus, ariko yongeraho ko iki cyorezo kitaragera ku iherezo.

Biteganyijwe ko iyi nteko ishobora gufata izindi ngamba zigamije kurwanya inkubiri ya kabiri y'iki cyorezo mu Bushinwa.

Biteganyijwe kandi ko iyi nteko iganira ku mubano na leta zunze ubumwe za Amerika wifashe nabi cyane mu gihe isi iri mu bihe bidasanzwe, ibi bikazagira ingaruka ku iterambere ry'ubukungu ku isi.

Mu gihe iyi virus ishobora kuza ku isonga ry'ibiganirwaho muri iyi nteko, abategetsi bakuru - barimo Perezida Xi Jinping na Li Keqiang umukurikira mu butegetsi - ntabwo bari bambaye agapfukamunwa.

Imirongo yose ibiri y'imbere yicaraho abakomeye mu butegetsi ntibari bambaye utu dukoresho two kwirinda no kurinda abandi. Abandi bagize iyi nteko bo bari batwambaye.

Nta ntego z'iterambere uyu mwaka

Ku nshuro ya mbere Ubushinwa ntabwo buzashyiraho intego z'iterambere mu mibare muri uyu mwaka nk'uko byatangajwe iyi nteko itangira.

Mu gihembwe cya mbere cy'uyu mwaka, ubukungu bw'Ubushinwa bwagabanutse ku kigero cya 6,8% kubera iki cyorezo.

Ubushinwa, igihugu cya kabiri mu bukungu bukomeye ku isi, abahanga mu bukungu bavuga ko ingaruka z'ihungabana ry'ubukungu bw'iki gihugu zizagera no ku bindi bihugu byinshi.

Ubushinwa ni igihugu gisa n'ikigenga ubukungu kuko ni umucuruzi ndetse n'umuguzi munini w'ibintu na serivisi ku bwinshi ku isi.