Coronavirus ubu yageze muri leta 50 zose zigize Amerika

Icyorezo cya coronavirus ubu kimaze kugera muri leta zose 50 zigize Leta Zunze Ubumwe z'Amerika, nyuma yaho leta ya West Virginia ejo ku wa kabiri itangarije umuntu wa mbere wanduye iyo virusi.

Ubwo yatangazaga uwo muntu wa mbere urwaye indwara y'ubuhumekero ya Covid-19 iterwa n'ubu bwoko bushya bwa coronavirus, Jim Justice, Guverineri w'iyo leta, yagize ati:

"Twari tubizi ko ibi biri hafi gushyika".

Ubuyobozi bw'umujyi wa New York City bwatangaje ko buri kwiga ku guhagarika ubuzima mu mujyi nk'uko byakozwe mu karere ka San Francisco Bay.

Kugeza ubu muri Amerika abantu 108 bamaze kwicwa n'iki cyorezo cya coronavirus naho abarenga 6,300 ni bo bamaze kwemezwa ko barwaye coronavirus muri iki gihugu.

Ku isi ubu habarurwa abantu hafi 200,000 bamaze kuyandura. Abagera hafi ku 8,000 imaze kubica.

Mu gihe ubutegetsi bwa Perezida Donald Trump buri gushaka amafaranga y'ingoboka ku bukungu angana na triyari imwe y'amadolari, umunyamabanga w'Amerika ushinzwe iby'imari hari ibyo yaburiye.

Amakuru avuga ko ejo ku wa kabiri nimugoroba, Steven Mnuchin yaburiye ukwabo abasenateri bo mu ishyaka ry'abarepubulikani ko inteko ishingamategeko ninanirwa kugira icyo ikoze, abadafite akazi muri Amerika bashobora kugera ku kigero cya 20%.

Icyo kigero cyaba cyenda gukuba inshuro ebyiri umubare w'abashomeri bari bariho mu gihe cy'ihungabana rikomeye ry'ubukungu ryabayeho muri Amerika mu mwaka wa 2008.

Umujyi wa New York City urateganya gukora iki?

Bill de Blasio, umukuru w'umujyi wa New York City, yavuze ko mu minsi ibiri iri imbere azafata icyemezo niba yategeka ko abaturage miliyoni 8.5 "baguma iwabo".

Icyemezo nk'icyo ahanini cyatuma abantu batemererwa kuva mu ngo zabo, kikabemerera gukora ingendo za ngombwa bajya kugura imboga zo guteka cyangwa imiti, batembereza imbwa zabo cyangwa bakora imyitozo ngororangingo mu gihe cyose baba birinze guhura n'abandi bantu.

Bwana de Blasio yagize ati: "Ni icyemezo gikomeye cyane. Nta na rimwe mbere twigeze tuba mu bihe nk'ibi. Nta na rimwe nigeze numva ikintu nk'iki mu mateka y'umujyi wa New York City".

Abategetsi bo mu gace ka San Francisco Bay bamaze gutegeka abaturage miliyoni 6.7 bahatuye kuguma mu ngo zabo igihe cyose, ukuyemo aho bibaye ngombwa ko bava mu rugo, kugeza ku itariki ya 7 y'ukwezi gutaha kwa kane.