Ubwo Trump yagezaga ijambo ku nteko, Nancy Pelosi yatabuye kopi y'ijambo rye

Inyandiko gusa
Visi-Perezida w'Amerika Mike Pence (ibumoso) akoma amashyi mu gihe umukuru w'inteko y'Amerika Nancy Pelosi yacaga kopi y'ijambo rya Perezida Trump

Ahavuye isanamu, AFP

Insiguro y'isanamu, Visi-Perezida w'Amerika Mike Pence (ibumoso) akoma amashyi mu gihe umukuru w'inteko y'Amerika Nancy Pelosi yacaga kopi y'ijambo rya Perezida Trump

Perezida Donald Trump yashimagije icyo yise "kugaruka mu ruhando rw'amahanga kw'Amerika" mu ijambo ngaruka mwaka yagejeje ku nteko ishingamategeko y'iki gihugu habura umunsi umwe ngo habe icyitezwe ko ari ukugirwa umwere kwe mu rubanza rwo kumweguza.

Bwana Trump yanakoresheje iryo jambo mu kuvuga ko acyeneye kongera gutegeka Amerika mu yindi manda y'imyaka ine iri imbere.

Nancy Pelosi, umukuru w'inteko ishingamategeko, yatabuye kopi y'ijambo rya Bwana Trump ubwo yari ari kuri 'podium' ahavugirwa amagambo.

Perezida Trump yirinze kwibasira abagize inteko inshinga amategeko bagerageje kumweguza ku butegetsi, nubwo yanyujijemo akanenga abo mu ishyaka ry'abademokarate.

Uyu perezida wo mu ishyaka ry'abarepubulikani yavuze iryo jambo ryo mu ijoro ry'ejo ku wa kabiri ari mu nteko y'Amerika igenzurwa n'abo mu ishyaka ry'abademokarate batoreye kumweguza.

Mu kindi gice gikorerwamo na sena y'Amerika, byitezwe ko kuri uyu wa gatatu batora bagira umwere Bwana Trump ku byaha aregwa.

Abo mu ishyaka ry'abarepubulikani bari mu nteko bumvikanye batera hejuru bati "indi myaka ine [ya manda]" ubwo Bwana Trump yiteguraga kuvuga ijambo, bamutera akanyabugabo mu matora yo mu kwa cumi na kumwe uyu mwaka.

Trump na Pelosi bashyamiranye gute?

Mbere yuko Perezida Trump atangira kuvuga ijambo rye ari kuri 'podium', yagaragaye yanga gusuhuza Madamu Pelosi wari wateze akaboko ngo bahane umukono, na we aza gutabura kopi y'ijambo rye.

Skip Ibisomwa cane and continue reading
Ibisomwa cane

End of Ibisomwa cane

Abanenga Madamu Pelosi bavuga ko babonye ko yasimbutse umugenzo wo guha ikaze perezida nk'"umunyacyubahiro udasanzwe".

Bwari bwo bwa mbere Bwana Trump ahuye amaso ku maso n'uwo batavuga rumwe bikomeye muri politiki kuva Madamu Pelosi yakwivumbura agasohoka mu nama mu biro bya perezida mu mezi ane ashize.

Ubwo perezida yashinjaga abo mu ishyaka ry'abademokarate gucura umugambi wo guha ubwishingizi mu buzima abimukira badafite ibyangombwa, Madamu Pelosi yagaragaye inshuro ebyiri avuga ati: "Si byo".

Perezida Trump ubwo yari ageze mu nteko kuyigezaho ijambo ngarukamwaka ry'uko igihugu gihagaze

Ahavuye isanamu, Getty Images

Insiguro y'isanamu, Perezida Trump ubwo yari ageze mu nteko kuyigezaho ijambo ngarukamwaka ry'uko igihugu gihagaze

Yatunguye abari bakurikiye iryo jambo ubwo yacaga kopi y'iryo jambo rya perezida ubwo yari arangije kurivuga.

Nyuma Madamu Pelosi yabwiye abanyamakuru ko ibyo yakoze "ari cyo kintu kigaragaza ikinyabupfura yagombaga gukora".

Video : uko vyagenze

Insiguro ya video, Umukuru w’inama nshingamateka ntiyasiguye ko yoba yabikoze ngo amwihore,

Ni iki kindi perezida yavuze?

Bwana Trump yumvikanye avugana akanyabugabo iryo jambo rye ryamaze isaha n'iminota 18, ritandukanye cyane n'iryo yavuze yinubira "isenyuka ry'Amerika" mu ijambo rye rya mbere nka Perezida mu 2017.

Mu cyumvikanye nko kunenga mu buryo buteruye Barack Obama yasimbuye ku butegetsi, Bwana Trump yabwiye abamuteze amatwi ati:

"Mu myaka itatu gusa, twacececyesheje imyumvire yo gusenyuka kw'Amerika ndetse twanga isubira inyuma ry'Amerika".

"Turi kujya imbere ku ntambwe itaratekerezwaga mu gihe gito gishize, kandi ntituzasubira inyuma na rimwe!"

Bwana Trump yagiye akomeza gusotora (kunenga) abo mu ishyaka ry'abademokarate, barimo n'abakandida nka Bernie Sanders bahanganye na we mu matora ya perezida y'uyu mwaka.

Ati: "Ntabwo tuzigera na rimwe twemera ko uburyo bw'ubukungu buhurije hamwe (socialism) busenya urwego rw'ubuzima rw'Amerika!"

Abanenga Bwana Trump bavuga ko atarigera agaragaza gahunda ye afitiye urwego rw'ubuzima.