Angola: urukiko rwategetse ifatirwa ry'imitungo ya Isabel dos Santos, umukobwa w'uwahoze ari perezida

Inyandiko gusa
Isabel dos Santos igihe yari ari i Cannes mu iserukiramuco ry'amafilimi i Palais des Festivals ku ya 14/5/2018 mu Bufaransa

Ahavuye isanamu, Getty Images

Insiguro y'isanamu, Isabel dos Santos w'imyaka 46, ubu aba mu mahanga

Urukiko muri Angola rwategetse ifatirwa ry'imitungo na konti za banki by'umukobwa w'uwahoze ari perezida wa Angola, José Eduardo dos Santos.

Icyemezo cy'ifatirwa ry'iyi mitungo ni imwe mu ngamba zo kurwanya ruswa muri iki gihugu gikungahaye kuri peteroli.

Ubutegetsi bwa perezida Joao Lourenço buri gushaka kugaruza akayabo ka miliyari y'amadolari (1.000.000.000) guverinoma ivuga ko umukobwa wa Bwana dos Santos, Isabel dos Santos n'abo bakorana bayifitiye.

Yamye ahakana ibyo aregwa kuva se akiri ku butegetsi.

Madamu Dos Santos ukunze kugugwa ko ari we mugore ukize ku mugabane wa Afurika, ikinyamakuru cyibanda ku by'imari, Forbes kigereraywa ko afite umutungo ungana na miliyari ebyiri na miliyoni magana abiri z'amadolari (2.200.000.000).

Uyu mugore w'imyaka 46 y'amavuko, atuye mu mahanga, avuga ko yavuye muri Angola kubera ko ubuzima bwe bwari bwugarijwe.

Afite ikigo gikomeye gifite imigabane mu bigo by'ubucuruzi muri Angola no muri Portigal aho ahifte n'imigabane mu kigo cya televiziyo Nos SGPS.

Itangazamakuru rya leta rivuga ko urukiko rwategetse ifungwa rya konti za Madamu dos Santos n'ifatirwa ry'imigabane y'umutungo we mu bigo byo mu gihugu birimo nk'ikigo cy'ituymanaho gikomeye kitwa Unitel na bank Fomento de Angola (BFA).

Skip Ibisomwa cane and continue reading
Ibisomwa cane

End of Ibisomwa cane

Mu butumwa yacishije ku rubuga nkoranyambaga rwa Twitter, Madamu Dos Santos ntiyavuze ku buryo butaziguye icyemezo cy'urukiko, ariko yavuze ko ngo "inzira ni ndende, ukuri kuzatsinda".

Madamu Dos Santos yagize umwanya ukomeye cyane muri 2016 igihe se yamugiraga umuyobozi w'ikigo cya leta cya peteroli, Sonangol.

Yirukanwe kuri uwo mwanya mu 2017 na perezida Lourenço, wanatoranyijwe na se wa Isabel kumusimbura ku butegetsi.

Musaza we José Filomeno dos Santos ari mu rubanza rubera muri Angola, aregwa ibyaha bya ruswa.

Ubushinjacyaha buvuga ko we n'abo baregwanwa bafashije kurigisa miliyoni 500 z'amadolari ya leta igihe Bwana Filomeno yari umuyobozi w'ikigo cya leta Sovereign Wealth Fund. Baburana bahakana ibyo bashinjwa.