Umutetsi wo mu Butaliyani wafatanywe urumogi 'yageragezaga kumva icyanga gishya'

Umutetsi uzwi cyane kubera ikiganiro cyo guteka anyuza kuri televiziyo wo mu kirwa cya Sicile mu Butaliyani, yatawe muri yombi acyekwaho gucuruza ibiyobyabwenge nyuma yaho polisi imusanganye urumogi iwe, nkuko bivugwa n'ibitangazamakuru byo mu Butaliyani.

Polisi ivuga ko Carmelo Chiaramonte yafatanywe ibihingwa bibiri bibini by'urumogi ndetse n'ikilo kimwe cy'uburozi bwo mu bwoko bwa 'Indian hemp'.

Divayi ivanzemo urumogi, imbuto za olive, ikawa n'amafi y'ibibeke, na byo byasanzwe mu rugo rwe ruri hafi y'ahitwa Catania, mu gice cy'uburasirazuba bwa Sicile.

Amakuru avuga ko uyu mutetsi yabwiye polisi ko yari ari gukora ubushakashatsi "ku cyanga gishya".

Bwana Chiaramonte yiyita ko ari "impuguke mu mitekere y'ibiribwa bikomoka ku buhinzi ijyanye n'iki gihe cy'ikinyagihumbi cya gatatu", nkuko byatangajwe n'ikinyamakuru La Sicilia cyo mu Butaliyani.

Uyu mutetsi w'imyaka 50 y'amavuko, utuye mu cyaro cya Trecastagni, ku 'kirenge' cy'ikirunga Etna, yabaye arekuwe hategerejwe ko aburana.

Bwana Chiaramonte, uzwi nk'inararibonye mu bijyanye n'imitekere y'indyo za hano i Sicile, akora mu gikoni cya resitora na hoteli Katane Palace iri i Catania.

Urubuga rwa internet rwe ruvuga ko ateka bijyanye n'"impumuro zitandukanye" ndetse n'"icyanga cy'abatuye mu karere ka [k'inyanja ya] Méditerranée".

Ikinyamakuru La Sicilia cyatangaje ko yanyuzaga ikiganiro kuri televiziyo kijyanye n'"amateka y'umusaruro n'imigenzo yo mu buhinzi bw'i Sicile".

Kimwe mu biganiro bye yacyise imitekere itemewe n'ibiribwa n'indyo zitera ugushaka kw'imibonano mpuzabitsina, nkuko bivugwa n'icyo kinyamakuru.