Urukiko mu Rwanda ntirwanzuye ku 'kurekura' Col Byabagamba na Rusagara

Inyandiko gusa
Col Byabagamba yakatiwe gufungwa imyaka 21, ubu arajuririra iki gihano

Ahavuye isanamu, BBC GAHUZA

Insiguro y'isanamu, Col Byabagamba yakatiwe gufungwa imyaka 21, ubu arajuririra iki gihano

Jean Claude Mwambutsa, BBC.

Uyu munsi Urukiko rw'ubujurire i Kigali rwari gutangaza umwanzuro ku kurekurwa by'agateganyo byasabwe na Col Tom Byabagamba, 'Jenerali' Frank Rusagara n'uwari umushoferi we François Kabayiza, ariko ibi ntibyabaye.

Nyuma y'amasaha abiri ku isaha yari iteganyijwe, urukiko rwavuze ko rutagitanze umwanzuro ku busabe bw'abaregwa kuko rwasabye inyandiko isobanura uburwayi bwa François Kabayiza.

Abaregwa, ubu bari kujurira, bari babwiye uru rukiko ko bafunze mu buryo bubi kandi budakurikije amategeko, bagasaba kurekurwa by'agateganyo ngo baburane badafunze.

Mu iburanisha riheruka, François Kabayiza wahoze ari umushoferi wa 'Jenerari' Frank Rusagara, yazanywe mu rukiko bigaragara ko arwaye cyane kuko yari atwawe mu maboko atabasha kwigenza.

Uyu munsi urukiko rwavuze ko tariki ya 5 y'ukwezi gutaha kwa karindwi ruzashyikirizwa inyandiko y'abaganga (rapport médical) ku burwayi bwe, rukayiburanishaho tariki 8 y'uko kwezi.

Nyuma ngo nibwo hazatangazwa umwanzuro ku byavuzwe n'abaregwa by'uburyo bafunze no ku busabe bwabo bwo kurekurwa by'agateganyo.

Col Byabagamba yagaragaje ko atishimiye kuba urukiko ntacyo rwavuze ku busabe bwabo bwo kurekurwa nk'uko byari biteganyijwe.

Skip Ibisomwa cane and continue reading
Ibisomwa cane

End of Ibisomwa cane

'Jenerali' Rusagara (ibumoso) na Col Byabagamba (wambaye gisirikare) basabye kurekurwa by'agateganyo

Ahavuye isanamu, BBC GAHUZA

Insiguro y'isanamu, 'Jenerali' Rusagara (ibumoso) na Col Byabagamba (wambaye gisirikare) basabye kurekurwa by'agateganyo

Col Byabagamba yahoze akuriye abarinda umukuru w'igihugu, Frank Rusagara uri mu kiruhuko cy'izabukuru we yahoze akuriye urukiko rwa gisirikare.

Mu mwaka wa 2016, Col Byabagamba yakatiwe gufungwa imyaka 21, 'Jenerali' Rusagara akatirwa imyaka 20 naho Kabayiza, akatirwa gufungwa imyaka itanu.

Bahamijwe ibyaha birimo guteza imvururu muri rubanda, kwamamaza nkana ibihuha bangisha abaturage ubutegetsi buriho n'icyaha cyo gusuzugura ibendera ry'igihugu - ibyaha abaregwa bahakanaga bakajurira.