Abashinjacyaha bavuga ko polisi y'Amerika itaryozwa kwica Stephon Clark, umwirabura utitwaje intwaro

Abashinjacyaha bavuze ko abapolisi babiri bo muri Leta Zunze Ubumwe z'Amerika ntacyo bazashinjwa mu rukiko kijyanye no kwica barashe Stephon Clark, umwirabura w'umugabo utari witwaje intwaro, mu kwezi kwa gatatu k'umwaka ushize wa 2018 muri leta ya California.

Icyo gihe Bwana Clark wari ufite imyaka 22 y'amavuko, yarashwe inshuro zigera kuri zirindwi ari mu gikari cyo kwa nyirakuru mu mujyi wa Sacramento.

Umushinjacyaha w'akarere yavuze ko abo bapolisi - barimo bakora iperereza ku bujura bwo mu ngo zo hafi aho - nta cyaha bakoze.

Urupfu rwe rwateje imyigaragambyo n'uburakari mu gihugu ku kuntu polisi ikoresha ingufu, cyane cyane iyo bigeze ku birabura b'abagabo.

Nyuma yo kwisegura ku bo mu muryango wa Bwana Clark, umushinjacyaha w'akarere, Anne Marie Schubert, yabwiye abanyamakuru ati: "Nta gushidikanya ko ikiremwa-muntu cyapfuye".

Yavuze ko iperereza ryamaze amezi rigenzura ibijyanye n'iryo raswa ryo ku itariki ya 18 y'ukwezi kwa gatatu mu mwaka ushize wa 2018, ryarebye niba hari icyaha cyakozwe. "Igisubizo kuri icyo kibazo ni oya, kandi kubera iyo mpamvu, nta wo kuryozwa ibyabaye".

'Gukoresha ingufu byari bikwiye'

Madamu Schubert yavuze ko gukoresha ingufu byari bikwiye kuko abapolisi bari bafite ubwoba ko ubuzima bwabo bwajya mu kaga, batekereza ko Bwana Clark yari afite imbunda kandi bivugwa ko yari yabaye nk'ugenda abasatira.

Ibyuma bifata amashusho (camera) abapolisi baba bambaye ndetse n'amashusho yafashwe n'indege ya kajugujugu, byahishuye ko abo bapolisi barashe Bwana Clark inshuro 20.

Nuko bamusangana gusa telefone ngendanwa yo mu bwoko bwa iPhone, ndetse bategereza iminota itanu mbere yo kumukorera ubutabazi bw'ibanze.

Abo bapolisi bashyizwe mu kiruhuko mu mwaka ushize wa 2018, ntabwo abategetsi batangaje amazina yabo kubera ubwoba ku mutekano wabo.

Daniel Hahn, ukuriye polisi y'i Sacramento, yavuze ko polisi y'aha izakora iperereza ryayo bwite kandi ko, bijyanye n'ikizarivamo, abo bapolisi bashobora kwirukanwa.

'Yari yarasuye imbuga zivuga ku kwiyahura'

Umushinjacyaha Schubert yanahishuye ko nyina w'abana ba Bwana Clark yari yaratanze ikirego kijyanye n'ihohoterwa ryo mu rugo iminsi ibiri mbere yuko Bwana Clark apfa, kandi ko Bwana Clark yari yarasuye imbuga za interineti zivuga ku kwiyahura.

Umushinjacyaha Schubert yavuze ko nyuma y'urupfu rwe, mu rwungano rw'umubiri we hasanzwemo ibiyobyabwenge kandi ko ibyo, byongewe ku "guta icyizere" kwe, bishobora kuba "byaragize uruhare ku byemezo" bye.

Ariko umuryango wa Bwana Clark ndetse n'impirimbanyi banenze umushinjacyaha Schubert kubera gutangaza ayo makuru.

Tanya Faison, ukuriye ishyirahamwe "Black Lives Matter", cyangwa "Ubuzima bw'abirabura bufite agaciro" ugenecyereje mu Kinyarwanda, yagize ati: "Abo bapolisi nta na kimwe bari bazi kuri ibyo ubwo bamusangaga mu gikari bakamwica".

Ubwo yatangaza ayo makuru ajyanye na Bwana Clark, umushinjacyaha Schubert yakomeje kugenda yisegura ku kuba byabaye ngombwa ko ayakomozaho.