Amakamyo atwaye imfashanyo y'Amerika y'ibiribwa n'imiti yangiwe kwinjira muri Venezuela

Inyandiko gusa
Amakamyo atwaye ibiribwa n'imiti ubu ari mu gace byafatirwamo ko mu mujyi wa Cúcuta muri Colombia

Ahavuye isanamu, AFP/GETTY IMAGES

Insiguro y'isanamu, Amakamyo atwaye ibiribwa n'imiti ubu ari mu gace byafatirwamo ko mu mujyi wa Cúcuta muri Colombia

Amakamyo ya mbere atwaye imfashanyo ya Leta Zunze Ubumwe z'Amerika igenewe Venezuela yageze mu mujyi wa Cúcuta wo muri Colombia, uhana imbibi na Venezuela.

Kuri ubu izi modoka ziparitse hafi y'iteme rya Tienditas, kugeza ubu rigifunzwe n'abasirikare ba Venezuela.

Perezida Nicolás Maduro wa Venezuela, ushyigikiwe n'igisirikare, yavuze ko atazemera ko iyi mfashanyo yinjira muri iki gihugu.

Juan Guaidó, umukuru w'abatavuga rumwe n'ubutegetsi witangaje ko ari perezida w'agateganyo wa Venezuela ku itariki ya 23 y'ukwezi gushize kwa mbere, yaburiye ko Abanya-Venezuela benshi bugarijwe n'ibyago byo gupfa niba nta mfashanyo y'amahanga ibonetse.

Ku wa kane, amakamyo atwaye ibiribwa n'imiti yageze mu gace ko kubifatiramo kari mu mujyi wa Cúcuta muri Colombia.

Izi modoka zari ziherecyejwe n'amapikipiki ya polisi ya Colombia.

Igisirikare cya Venezuela cyatambitse mu muhanda ikamyo itwara ibikomoka kuri peteroli mu kubuza ko amakamyo atwaye ibiribwa n'imiti yambuka iteme rya Tienditas

Ahavuye isanamu, AFP/GETTY IMAGES

Insiguro y'isanamu, Igisirikare cya Venezuela cyatambitse mu muhanda ikamyo itwara ibikomoka kuri peteroli mu kubuza ko amakamyo atwaye ibiribwa n'imiti yambuka iteme rya Tienditas

Ntibyahise bimenyekana niba iyi mfashanyo itangirwa hakurya y'umupaka.

Mbere yaho, igisirikare cya Venezuela cyari cyatambitse ikamyo itwara ibikomoka kuri peteroli n'imodoka zitwara imizigo ku iteme rya Tienditas, rihuza umujyi wa Cúcuta wo muri Colombia n'umujyi wa Ureña wo muri Venezuela.

Skip Ibisomwa cane and continue reading
Ibisomwa cane

End of Ibisomwa cane

Perezida Maduro (ibumoso) wa Venezuela na Bwana Guaidó (iburyo) witangaje nka perezida w'agateganyo w'iki gihugu

Ahavuye isanamu, AFP/Getty Images

Insiguro y'isanamu, Perezida Maduro (ibumoso) wa Venezuela na Bwana Guaidó (iburyo) witangaje nka perezida w'agateganyo w'iki gihugu

Bwana Maduro yanze iyi mfashanyo y'amahanga, avuga ko yacira inzira igikorwa cya gisirikare cy'Amerika cyo kumuhirika ku butegetsi.

Hagati aho, Mike Pompeo, umunyamabanga wa leta y'Amerika, ari gusaba ko iri teme ryongera gufungurwa, avuga ko "ubutegetsi bwa Maduro bugomba kureka imfashanyo ikagera ku baturage bari kwicwa n'inzara".

Bamwe mu bategetsi bo muri Venezuela na bo basabye igisirikare kureka iyi mfashanyo igahita.

Bwana Guaidó ni umukuru w'inteko ishingamategeko ya Venezuela, akaba avuga ko itegekonshinga ry'iki gihugu rimwemerera kuba afashe ubutegetsi by'agateganyo iyo perezida uriho afatwa nk'uriho mu buryo bunyuranyije n'amategeko.

Bwana Guaidó amaze gushyigikirwa n'ibihugu birenga 40, birimo Amerika na byinshi mu bihugu byo muri Amerika y'epfo n'i Burayi. Bwana Maduro we aracyashyigikiwe n'Ubushinwa n'Uburusiya.