Umuririmbyi Chris Brown yatawe muri yombi mu Bufaransa acyekwaho gufata umugore ku ngufu

Polisi y'Ubufaransa yatangaje ko yataye muri yombi umuririmbyi w'Umunyamerika Chris Brown mu murwa mukuru Paris acyekwaho gufata umugore ku ngufu.

Uyu mugore w'imyaka 24 y'amavuko, arega ko uyu muririmbyi w'icyamamare yamufashe ku ngufu mu cyumba cya hoteli y'i Paris mu ntangiriro y'uku kwezi kwa mbere.

Amakuru avuga ko uyu mugore yabwiye polisi ko bombi bahuriye mu nzu y'urubyiniro rwagati mu mujyi wa Paris, hafi y'ibiro bya perezida w'Ubufaransa bizwi nka Champs-Elysées, mbere yuko basubira muri hoteli.

Uyu muririmbyi w'imyaka 29 y'amavuko, ntacyo aratangaza ku byo aregwa. Polisi y'Ubufaransa iri gukora iperereza ku kirego cy'uyu mugore.

Abandi bagabo babiri ibitangazamakuru byo mu Bufaransa byatangaje ko ari ucunga umutekano wa Brown naho undi akaba inshuti ye, na bo batawe muri yombi.

Ubu si ubwa mbere Brown agonganye n'amategeko - hari izindi nshuro yahamwe n'ibyaha by'urugomo yakoreye abantu b'ibyamamare.

Mu mwaka wa 2009, yabaye afunguwe mu gihe cy'imyaka itanu kubera kwitwara neza muri gereza ndetse ategekwa gukora imirimo nsimburagifungo nyuma yo gukubitira mu modoka ye Rihanna wahoze ari umukunzi we.

Mu mwaka wa 2016, yatawe muri yombi acyekwaho gukubita akoresheje intwaro yica nyuma yaho umugore abwiriye polisi ko yamushyize ku nkeke amukangisha imbunda.

Nyuma yaje kurekurwa, nuko umwunganizi we mu mategeko avuga ko ibyo umukiliya we yaregwaga "byagaragaraga ko ari ibihimbano".