Amerika 'ntirafata umwanzuro' ku wategetse ko umunyamakuru Jamal Khashoggi yicwa

Abategetsi bavuga ko Leta Zunze Ubumwe z'Amerika zitarafata umwanzuro wa nyuma ku iyicwa ry'umunyamakuru Jamal Khashoggi, nubwo amakuru avuga ko urwego rw'ubutasi bwo hanze y'iki gihugu rwa CIA rwemeza ko yishwe ku itegeko ry'igikomangoma cya Arabie Saoudite.

Itangazo rya minisiteri y'ububanyi n'amahanga y'Amerika rivuga ko "hari ibibazo byinshi bitarasubizwa".

Hari ababwiye ibitangazamakuru byo muri Amerika ko nta kuntu uyu munyamakuru yari kwicwa atari igikomangoma Mohammed bin Salman watanze uruhushya rwo kumwica.

Arabie Saoudite yavuze ko ayo makuru atari ukuri, ivuga ko igikomangoma Mohammed bin Salman nta kintu na kimwe yari azi ku mugambi wo kwica uyu munyamakuru.

Perezida Donald Trump w'Amerika yavuze ko ku wa kabiri yiteguye guhabwa icyegeranyo gikubiyemo uwo abategetsi b'Amerika bemeza ko ari we waryozwa urupfu rw'uwo munyamakuru.

Khashoggi wanengaga bikomeye leta ya Arabie Saoudite, yishwe ku itariki ya kabiri y'ukwezi gushize kwa cumi amaze kwinjira mu nyubako y'ibiro by'uhagarariye Arabie Saoudite muri Turukiya iri mu mujyi wa Istanbul.

Yari yahagiye agiye gufata icyangombwa kimuha uruhushya rwo gushaka undi mugore - wo muri Turukiya - nyuma yo gutandukana n'uwundi.

Umurambo we nturaboneka.

Arabie Saoudite ivuga ko yiciwe mu "gikorwa kibi kitateganyijwe".

Umushinjacyaha wo muri Arabie Saoudite yashinje abantu 11 urupfu rwe, ndetse ari gusaba ko batanu muri bo bahanishwa igihano cy'urupfu.

Ariko nyuma yo kugenda ihindura imvugo ku rupfu rwe - nko ku ikubitiro yavugaga ko yasohotse muri ambasade - no mu gihe bicyekwa ko hari gukorwa ihishira ryo ku rwego rwo hejuru, Arabie Saoudite iracyotswa igitutu kubera iyicwa rye.