Mohammed bin Salman, igikomangoma cya Arabie Saoudite, yasezeranyije guhana 'abishe' umunyamakuru Khashoggi

Mohammed bin Salman, igikomangoma cya Arabie Saoudite, yasezeranyije guhana 'abishe' umunyamakuru Jamal Khashoggi.

Ubwo ku wa gatatu yagezaga ijambo ku bitabiriye inama y'iminsi itatu ku ishoramari mu murwa mukuru Riyadh, Mohammed bin Salman yavuze ko "icyaha cyakozwe cyababaje abaturage bose ba Arabie Saoudite" ariko ko atakwemera na rimwe ko iki gihugu gishyamirana na Turukiya mu buryo ubwo ari bwo bwose.

Mbere, Arabie Saoudite yahakanye ibirego by'uko iki gikomangoma Mohammed bin Salman - mu by'ukuri akaba ari we mutegetsi wa Arabie Saoudite - na we ubwe yaba yaragize uruhare mu iyicwa rya Bwana Khashoggi.

Mohammed bin Salman yavuze ko iyicwa ry'uyu munyamakuru ari "icyaha ndengakamere kidashobora gutangirwa impamvu iyo ari yo yose", nuko asezeranya ko "abagikoze bazabiryozwa...kera kabaye hazabaho ubutabera."

Yavuze ko habayeho ubufatanye bwiza na Turukiya, ariko yongeraho ati:

"Abantu benshi bari kugerageza kuba barusahurira mu nduru muri iki gihe kibabaje turimo, ngo bateze ubushyamirane hagati ya Arabie Saoudite na Turukiya. None ndashaka kubaha ubu butumwa: nta na rimwe ibyo muzabigeraho."

"Nta bushyamirane buzigera bubaho."

Aya ni yo magambo ya mbere igikomangoma Mohammed bin Salman avuze ku mugaragaro kuva Arabie Saoudite yakwemera ko Bwana Khashoggi yiciwe muri ambasade y'iki gihugu iri muri Turukiya.

Bwana Khashoggi yapfuye ubwo yajyaga mu nyubako y'ibiro by'uhagarariye Arabie Saoudite i Istanbul muri Turukiya, ku itariki ya 2 y'uku kwezi kwa cumi.

Icyo gihe yari yagiye gushaka ibyangombwa bimwemerera gukora ubukwe n'umukobwa wo muri Turukiya, nyuma yo gutandukana n'uwari umugore we.

Arabie Saoudite yegetse iyicwa rye ku ntasi zayo "zataye umurongo".

Perezida Recep Tayyip Erdogan wa Turukiya yavuze ko iyicwa ry'uyu munyamakuru wanengaga ubutegetsi bwa Arabie Saoudite, ari "ubwicanyi bufitanye isano na politiki" bwateguranywe ubwitonzi n'abakozi b'ubutasi bwa Arabie Saoudite bafatanyije n'abandi bategetsi b'iki gihugu.

Muri iyi nama y'iminsi itatu ivuga ku ishoramari, abategetsi ba Arabie Saoudite bagerageje kugaragaza ko nta gikuba cyacitse muri iki gihugu, ariko Khalid al-Falih, minisitiri w'ibikomoka ku ngufu [z'amashanyarazi] ku wa kabiri yemeye ko habayeho "akaga" katewe n'ikibazo cya Bwana Khashoggi.

Ku wa kabiri, igikomangoma Mohammed bin Salman w'imyaka 33 y'amavuko ufatwa nk'umutegetsi mukuru w'iki gihugu cya mbere ku isi mu kohereza mu mahanga ibikomoka kuri peteroli, yabigenje nka se, umwami Salman.

Yakoranye inama n'abo mu muryango wa Bwana Khashoggi.

Bamwe bashima amavugurura Mohammed bin Salman yakoze mu gihugu, ariko hari n'abamunenga cyane kubera uko iki gihugu cyitwara mu kibazo cya Yemen na Qatar, ndetse hari na bamwe basaba ko yasimburwa ku butegetsi kubera ikibazo cya Bwana Khashoggi, mu gihe hacyekwa ho hari uko yabigizemo uruhare.