Igitero kibasiye Pakistani gihitana abantu 31 ku munsi ki gihugu cyiriwe mu matora rusange

Ibikorwa by'urugomo byadutse mu gihugu cya Pakistani ku munsi abaturage babarirwa muri za miliyoni bagejeje igihe cyo gutora bitabiriye amatora, igitero gikomeye kikaba cyaguyemo abantu 31 bishwe n'igisasu mu mujyi wa Quetta.

Ahandi, ibitero bito byabaye ndetse habaho no gukozanyaho mu ndorerezi z'amashyaka, babiri bahasiga ubuzima naho abandi benshi barakomereka.

Abatora bari guhitamo hagati y'ishyaka rya Imran Khan, wahoze ari icyamamare mu mukino wa kriketi, ndetse n'irya Nawaz Sharif, wahoze ari Minisitiri w'intebe akava kuri uyu mwanya mu buryo buteye isoni.

Bwana Sharif watsinze amatora aheruka, ari gukurikirana aya matora ari muri gereza. Yafunzwe ashinjwa ibirego bya ruswa bikubiye mu iperereza ryasohowe mu nkuru za Panama Papers.

Ariko ibikorwa byo kwiyamamaza byaranzwe n'impungenge z'uko aya matora yabamo uburiganya n'ibikorwa by'urugomo.

Akanama k'uburenganzira bwa muntu muri Pakistani karavuga ko hagiye habaho ibikorwa "bigaragara" byo kugerageza gukora uburiganya ku biva muri aya matora.

Nubwo umutekano wakajijwe mu gihugu hose - abasirikare barenga ibihumbi 370 boherejwe kurinda ibiro by'amatora bitandukanye, ibikorwa by'urugomo byanze bibaca mu rihumye.

Abategetsi baravuga ko igitero cyo mu mujyi wa Quetta, mu ntara ituje ya Balochistan, cyari igitero cy'ubwiyahuzi cyari kigambiriye guhitana abapolisi bari bari ku muryango w'ibiro by'itora.

Mu ntangirio y'uku kwezi, igitero cyabereye mu gace ka Mastung gaturanye n'ahabereye icy'uyu munsi, cyishe abantu 149.

Kiba kimwe mu bitero by'ubwiyahuzi bikoresheje ibisasu cyaguyemo abantu benshi cyane mu mateka ya Pakistani. Cyigambwe n'umutwe wiyita leta ya kisilamu.

Aya matora y'uyu munsi ni ingenzi kubera ko buraba bubaye ubwa kabiri leta iyobowe n'abasivili iba ihaye ubutegetsi indi leta nayo iyobowe n'abasivili, nyuma yo kurangiza manda yayo yose.

Mu mateka y'iki gihugu angana n'imyaka 71, cyamye kiyoborwa bya hato na hato n'ubutegetsi bwa gisirikare.