Umugabo muri Kenya araregera indishyi kubera "udukingirizo duturika"

Umugabo wo muri Kenya yatanze ikirego mu rukiko asaba ko ikigo cy'igihugu cy'ubuziranenge, icy'imisoro n'amahoro n'igicuruza imiti cya Beta Healthcare, byose bimuha indishyi, kubera indwara yanduye.

Izo ndwara ngo yaranduriye mu mibonano mpuzabitsina itewe n'udukingirizo tutujuje ubuziranenge.

Amakuru atangazwa n'ibinyamakuru byo muri Kenya aravuga ko uyu mugabo utatangajwe umwirondoro yavuze ko ibyo bigo uko ari bitatu byananiwe kurengera abaguzi bigaha ikirango cy'ubuziranenge udukingirizo tuzwi nka Zoom Condoms.

Ayo makuru ntabwo avuga icyo abaregwa babivugaho.

Uyu mugabo avuga ko yahise yanduza iyo ndwara umugore we, ibintu avuga ko bitari kuba byarabayeho iyo aza kuba yarakoresheje agakingirizo kujuje ubuziranenge.

Avuga ko yaguze utwo dukingirizo ku matariki atandukanye hagati y'ukwezi kwa mbere n'ukwezi kwa 10 mu mwaka wa 2014 mu bice bitandukanye bya Kenya.

Mu nyandiko mvugo yashyikirije urukiko, avuga ko ku itariki 13 y'ukwezi kwa 10 mu mwaka wa 2014 ari bwo yatangiye kubona utuntu tw'uduheri ku myanya ndangagitsina ye ndetse akagira ububabare agiye kwihagarika.

Ikinyamakuru the Star cyo muri Kenya gisubiramo amagambo ye avuga ko ibyo bikimara kuba, yahise yibuka ko hari agakingirizo katuritse ubwo yagakoreshaga mu minsi icyenda yari ishize.

Avuga ko yahise ajya ku muvuzi gakondo akamuha imiti yagabanyije ububabare.

Avuga ko yagize ihungabana muri we, atangira no kunywa ibiyobyabwenge cyane. Ibyo ngo byamuviriyemo kwirukanwa ku kazi no gutandukana n'umugore we.