Ethiopia: Leta iri kohereza ingabo nyinshi muri Tigray ahari imirwano

Leta ya Ethiopia iri kwegeranya ingabo nyinshi mu gihugu hose mugihe ikomeje ibitero ku karere kayo ka Tigray mu majyaruguru. Minisitiri w'intebe Abiy avuga ko ibi bitero bifite "intego n'igihe runaka" bizamara.

Umugaba w'ingabo wungirije, Jenerali Berhanu Jula, yavuze ko ingabo ziri kujya mu majyaruguru gufasha ikicaro cy'ingabo cyaho kigaruriwe n'abasirikare ba leta y'akarere ka Tigray.

Ethiopia ni igihugu kigizwe na leta zitandukanye z'uturere, zihuzwa kandi zigategekwa na leta y'igihugu yo mu murwa mukuru Addis Ababa.

Debretsion Gebremicheal utegeka leta ya Tigray - n'ishyaka rihategeka TPLF - yavuze ko ingabo z'aka karere zafashe "intwaro hafi ya zose" z'ibirindiro by'ingabo za leta y'igihugu muri Tigray.

Yavuze kandi ko ingabo zabo ziri "mu ntambara" ku mupaka wa Tigray n'indi leta bituranye ya Amhara.

Abategetsi muri Amhara bemeje ko hari imirwano iri kubera mu karere k'umupaka ihana na Tigray nk'uko umunyamakuru wa BBC muri Ethiopia abivuga.

Biragoye kumenya ubukana bw'imirwano iri kuhabera kuko internet na telephone byakuweho mu karere ka Tigray.

Mu butumwa yashyize kuri Twitter Minisitiri w'intebe Abiy Ahmed yavuze ko ibi bitero by'ingabo za leta "bifite igihe ntarengwa" n'intego zo kugeraho.

Umunyamakur wa BBC Kalkidan Yibeltal uri i Addis Ababa avuga ko nta kimenyetso ko aya makimbirane ari buhagarare vuba.

Abadipolomate bati iki?

António Guterres, umunyamabanga mukuru wa ONU yavuze ko "ahangayikishijwe cyane" n'ibiri kuba, ndetse ahamagararira "guhagarika ikwirakwira ry'imirwano ako kanya".

Umumabanga wa Amerika ushinzwe ububanyi n'amahanga Mike Pompeo nawe yasohoye itangazo risaba ko imirwano ihagarikwa ako kanya.

Umuryango w'ubumwe bwa Africa, ufite ikicaro i Addis Ababa, uri gusaba ko habaho ibiganiro, ariko guverinoma ya Abiy ntibishaka nk'uko bivugwa n'ibiro ntaramakuru Reuters.