Perezida Kagame avuga ko ingabo z'u Burundi ziri muri Kivu y’Epfo, u Burundi burabihakana

Inyandiko gusa
Perezida Paul Kagame mu kiganiro n'abanyamakuru i Kigali

Ahavuye isanamu, live event

Insiguro y'isanamu, Perezida Paul Kagame mu kiganiro n'abanyamakuru i Kigali

Mu kiganiro yahaye abanyamakuru, Perezida w'u Rwanda Paul Kagame yasubije ku kibazo cy'umutekano mucye uvugwa mu burasirazuba mu ntara ya Kivu y'Epfo ya DR Congo, yemeza ko ingabo z'u Burundi ziri muri ako gace.

Muri iyi minsi haravugwa imirwano y'imitwe itandukanye yitwaje intwaro mu gace k'amajyepfo y'intara ya Kivu y'pfo.

Iyo mitwe irimo iy'abanyecongo ubwabo n'imitwe y'inyeshyamba irwanya leta y'u Rwanda cyangwa irwanya leta y'u Burundi.

Hari amakuru atandukanye avuga ko ingabo z'u Rwanda n'ingabo z'u Burundi nazo ziri mu mirwano iri kubera muri Kivu y'Epfo.

Perezida Paul Kagame yabwiye abanyamakuru ko amakuru inzego z'iperereza z'u Rwanda zakusanyije yemeza ko hari ingabo za leta y'u Burundi ziri muri iyo mirwano muri Kivu y'Epfo.

Mu butumwa bwanditse, umuvugizi w'ibiro by'umukuru w'igihugu mu Burundi Jean Claude Karerwa yabwiye BBC ko nta ngabo z'u Burundi ziri mu kindi gihugu mu buryo butazwi.

Ati: "Kereka bisabwe gusa n'Ubumwe bwa Afurika cyangwa Umuryango w'Abibumbye, u Burundi ntibushobora kohereza ingabo mu kindi gihugu".

Umwaka ushize, leta zombi zareganye gushyigikira imitwe irwanya buri ruhande ikorera muri Kivu y'Epfo.

Skip Ibisomwa cane and continue reading
Ibisomwa cane

End of Ibisomwa cane

Bwana Kagame, yavuze ko muri ako gace ka Kivu y'Epfo hari imirwano ishyamiranyije uruvangiritane rw'imitwe myinshi cyane irimo n'ifatanya n'ingabo z'u Burundi.

Avuga ko Abanyarwanda bariyo ari abarwanyi ba FDLR n'indi mitwe yayikomotseho.

Ati: "Nta musiriakre numwe wa RDF (Rwanda Defence Forces) wagiye muri ako karere, ndabivuga mbihagazeho, ko nta musirikare numwe wacu uriyo.

"Ariko abanyamakuru bamwe, n'abiyita inzobere, bavuga ko babanyoyeyo, gusa ari na guverinoma ya Congo n'ingabo za Congo barabizi ko nta musirikare wacu uri hariya".

Bwana Kagame yavuze ko ikintu cyiza kiriho ari uko leta ya Congo iriho ubu yemera gufatanya n'ibihugu bituranye gukemuka ikibazo cy'imitwe y'inyeshyamba kimaze imyaka myinshi.

Mu kwezi kwa 10 umwaka ushize ingabo za Congo zatangije ibikorwa byo kurandura imitwe yitwaje intwaro mu burasirazuba bw'igihugu.

Gusa ikibazo cy'iyi mitwe biboneka ko kitararangira.