U Rwanda rwemeje umuntu wa mbere wanduye coronavirus
Ahavuye isanamu, GOVERNMENT OF RWANDA/FACEBOOK
Itangazo rya minisiteri y'ubuzima rivuga ko uwo murwayi wanduye icyorezo cya coronavirus ari umuturage w'Ubuhinde wageze mu Rwanda ku itariki ya 8 y'uku kwezi kwa gatatu.
Iryo tangazo rivuga ko uwo mugabo yari avuye mu mujyi wa Mumbai, yamara gusuzumwa bakayimusangamo nubwo ngo yari yageze mu Rwanda nta bimenyetso agaragaza.
Yijyanye ku kigo nderabuzima ku itariki ya 13 y'uku kwezi, nkuko bivugwa n'iryo tangazo, ari nabwo yasuzumwe bakamusangamo indwara ya Covid-19 yo mu myanya y'ubuhumekero iterwa n'ubu bwoko bushya bwa corovarirus.
Minisiteri y'ubuzima ivuga ko ubu "avurwa, ameze neza, kandi yatandukanyijwe n'abandi barwayi".
Yongeyeho ko hamaze gushakishwa "abo yaba yarahuye nabo kugira ngo niba hari uwanduye avurwe, kandi indwara ntikwirakwizwe".
Iryo tangazo risoza rivuga ko "Abanyarwanda bose bagomba gukomeza gukurikiza amabwiriza y'isuku atangwa n'ubuyobozi bw'urwego rw'ubuzima, cyane cyane gukaraba intoki igihe cyose".
Rinabasaba kandi kwirinda kujya ahantu hahurira abantu benshi no kumenyesha inzego zibishinzwe mu gihe hari ugaragaje ibimenyetso, hakoreshejwe umurongo wa telefone utishyurwa wa 114.
U Rwanda ruriteguye?
Mu kiganiro na Radio Rwanda, Dr Ngamije Daniel, Minisitiri w'ubuzima w'u Rwanda, yavuze ko igihugu cyiteguye mu nzego zitandukanye.
Ati: "Igihugu kiriteguye...mu bushobozi buhari bujyanye n'abakozi bahuguwe..."
Dr Ngamije yavuze kandi ko mu gihe cy'ibyumweru bibiri biri imbere guhera kuri uyu wa gatandatu, hahagaritswe guterana "bitari ngombwa" kw'abantu benshi cyangwa ahandi hahuriwe n'abantu benshi mu buryo bw'ubucucike.
Kagame avuga ko u Rwanda ruzatsinda iki cyorezo
Mu ruhererekane rw'ubutumwa bwo kuri Twitter, Perezida Paul Kagame yavuze ko "Nkuko bisanzwe, tuzatsinda muri ibi bihe bikomeye binyuze mu bufatanye no gukorera hamwe".
Yasabye kuzirikana ku bo "imaze kuvutsa ubuzima [ku isi], imiryango yabo n'inshuti zabo".
Bwana Kagame yanifurije "abayirwaye bose gukira vuba", anashimira Dr Tedros Adhanom Ghebreyesus, umukuru w'ishami ry'umuryango w'abibumbye ryita ku buzima (OMS/WHO) n'iryo shami ubwaryo "bakomeje kutugenda imbere muri ibi bihe".
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
