Coronavirus: Isi yashyizwe mu bihe bidasanzwe, Rwandair yahagaritse ingendo zayo mu Bushinwa
Ahavuye isanamu, Getty Images
Ishami ry'umuryango w'abibumbye ryita ku buzima, OMS/WHO,ryatangaje ko ubu isi iri mu bihe bidasanzwe kubera virus ya Coronavirus ikomeje gukwirakwira no hanze y'Ubushinwa.
Tedros Ghebreyesus, utegeka OMS yagize ati: "Impamvu nyamukuru yo gutangaza ibi si ibiri kubera mu Bushinwa ahubwo n'ibiri kuba no mu bindi bihugu".
Impungenge ziriho ni uko iyi ndwara ishobora kugera mu bihugu bifite ubuvuzi budateye imbere.
Umuryango w'ibihugu bigize Africa y'iburasirazuba, EAC, wasabye ibihugu biwugize kuba maso bikitegura guhangana n'iyi virus.
Kompanyi y'indege ya leta y'u Rwanda, Rwandair, imaze gutangaza ko kuva uyu munsi kugeza igihe kizatangazwa, ihagaritse ingendo yakoreraga i Guangzhou mu Bushinwa.
Mu itangazo yasohoye, Rwandair ivuga ko ibi bitewe n'indwara ya coronavirus yamaze gutangazwa nk'icyorezo cyatumye isi ijya mu bihe bidasanzwe by'ubuzima.
Usibye Rwandair na Kenya Airways, izindi kompanyi eshatu Air Madagascar, Air Mauritus na Royal Air Maroc nazo zahagaritse ingendo zakoreraga mu Bushinwa kubera iyi virus.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Ibikorwa nk'ibi byo kwitegura no kwirinda birakorwa n'ibindi bihugu byo mu karere.
Mu kiganiro n'abanyamakuru i Geneve, Bwana Tedros yavuze ko iyi virus "ari icyorezo kidasanzwe" ariko "kiri kurwanywa mu buryo budasanzwe".
Yashimye umuhate n'ingamba za leta y'Ubushinwa mu kurwanya iyi virus, avuga ko abona nta mpamvu yo kugabanya cyangwa kubuza abantu kujya mu Bushinwa.
Gusa ibihugu nka Leta zunze ubumwe za Amerika zabujije abaturage bazo kujya mu Bushinwa.
Muri Amerika kandi ejo kuwa kane abashinzwe ubuzima bemeje ko babonye umuntu wa mbere wanduye iyi ndwara atarageze mu Bushinwa ayivaye ku wahavuye.
Ahavuye isanamu, CDC
Naho Uburusiya bwamaze gufunga umupaka wabwo wose n'Ubushinwa.
Mu Bushinwa iyi ndwara imaze guhitana abantu 213, abantu hafi 10,000 bamaze kuyandura.
OMS ivuga ko hari abantu 98 mu bihugu 18 ku isi bamaze kuyandura, gusa ntawe irahitana hanze y'Ubushinwa.
Ibihugu na kompanyi zinyuranye biri guhagarika no kugabanya ingendo n'ibikorwa mu Bushinwa.
Kompanyi nka Google, Ikea, Starbucks na Tesla zafunze ibikorwa byazo mu Bushinwa.
Ni ryari bundi OMS yatangaje icyemezo nk'iki?
Gutangaza ko isi yinjiye mu bihe bidasanzwe biba bigamije kongera umuhate mu gukumira no kurwanya icyorezo kidasanzwe;
- Inshuro eshanu mu bihe bishinzwe nibwo OMS yatangaje ko isi yinjiye mu bihe bidasanzwe by'ubuzima;
- Ibicurane by'ingurube, 2009 -Icyo gihe Virus ya H1N1 yakwiriye ahayuranye ku isi yica abantu 200,000.
- Imbasa, 2014 - Nubwo yari hafi gucika ku isi mu 2012, imibare yayo yarazamutse cyane mu 2013 maze OMS itangazo iyi ngingo.
- Zika, 2016 - OMS yatangaje ko Zika yashyize isi mu kaga mu gihe yariho ikwirakwira cyane muri Amerika y'epfo.
- Ebola, 2014 na 2019 - Bwa mbere ni mu 2014 ubwo abantu 30,000 bayanduraga muri Afurika y'Iburengerazuba 11,000 ikabica. Ubuheruka ni umwaka ushize igihe yacaga ibintu muri DR Congo.
