Rwanda: Mu byumweru bibiri abantu 191 barafunzwe kubera gutwara ‘basinze’

Jean Claude Mwambutsa/BBC Gahuzamiryango i Kigali

Polisi mu Rwanda ikomeje imikwabu idasanzwe yo gufata abatwara imodoka basinze, mu gihe kigera ku kwezi abarenga 700 barafunzwe, bamwe bavuga ko birimo akarengane.

Polisi ivuga ko ibi bikorwa mu bukangurambaga bumaze igihe bugamije kugabanya umubare w'impanuka zo mu muhanda, ikemeza ko inyishi ziterwa n'abatwara imodoka basinze.

Ku mande y'ibihumbi 150 ubu hiyongeraho no gufungwa iminsi itanu iyo wafashwe.

Abafatwa ariko bavuga ko akenshi bibamo akarengane kuko uburyo bwo kwemeza ko basinze bugibwaho impaka.

Polisi y'u Rwanda ivuga ko mu byumweru bibiri bisoza ukwezi gushize kwa cyenda abantu 191 bafashwe batwaye banyoye ibisindisha birengeje igipimo giteganywa n'amategeko.

Mu gihe kigera ku kwezi ibi bikorwa bikajijwe abantu bagera kuri 700 barafashwe.

Igipimo cyitwa BAC (blood alcohol concentration) kingana na 0,08 mu maraso nicyo ntarengwa cy'inzoga umuntu atagomba kurenza atwaye ikinyabiziga mu Rwanda.

Iki gipimo kigendana n'ibiro by'umuntu wanyoye inzoga.

Abafatwa bo bavuga ko iyo bafashwe polisi itabasha kugaragaza ko barengeje koko icyo gipimo kuko abenshi nta bikoresho byabugenewe baba bafite.

Igipimo ntarengwa ni amacupa angahe?

Umwe mu baherutse gutabwa muri yombi agafungwa iminsi itanu utifuje gutangazwa amazina, avuga ko ibi bikorwa byashyizwemo imbaraga zikabije kandi birimo akarengane.

Uyu avuga ko abapolisi bitiranya kunywa no gusinda, avuga ko yatawe muri yombi yanyoye amacupa atatu y'inzoga ya mutziig yari asanzwe anywa agatwara imodoka ye nta kibazo.

Abahanga mu by'imirire bavuga ko umugore upima ibiro 60 ageza ku gipimo cya 0,08 cy'inzoga mu maraso mu gihe yanyoye amacupa (nibura 350ml rimwe) abiri y'inzoga (beer/ Bière).

Umugabo w'ibiro 80 ageza kuri kiriya gipimo gihanwa n'amabwiriza mu Rwanda mu gihe yanyoye amacupa ane y'inzoga.

Uretse imikwabu yakajijwe na polisi mu mihanda yo mu mijyi mu Rwanda, muri ubu bukangurambaga polisi inakurikirana cyane abacuruza inzoga bashobora kuziha abatagejeje ku myaka 18.

Mu tubari (bars) twinshi hamaze kumanikwa ibyapa byibutsa abantu ko batagomba gutwara banyoye.

Ba nyiri utubari nabo ubu basabwa kwibutsa no kuburira abakiliya babo mu gihe babona bamaze gufata agatama (inzoga) kenshi.