Somalia: Al Shabab ivuga yagabye igitero ku ngabo za Amerika

Umutwe w'iterabwoba wa Al Shabab watangaje ko wagabye ibitero ku birindiro by'ingabo za Amerika ku kibuga cy'indege cya gisirikare cya Ballogoogle bakica abasirikare 'benshi' ba Amerika.

Ibi bitero byabaye mu gitondo cya none ku wa mbere mu gace ka Shebelle kuri 100Km mu burengerazuba bwa Mogadishu.

Mu itangazo uyu mutwe wa Al Shabab wasohoye, uvuga ko aha hantu wagabye igitero ariho hategurirwa hakanava indege za 'drones' zikora ibikorwa binyuranye muri Somalia.

Ambasade ya Amerika muri Somalia yatangaje ko ibitero bya Al Shabab byasubijwe inyuma n'ingabo za Somalia zikorera muri Baledogle.

Mu itangazo ryasohowe n'iyi ambasade, ambasaderi Donald Yamamoto wa Amerika avuga ko ingabo zabujije aba barwanyi kugera ku mugambi wabo ndetse ko nta musirikare wa leta waguye mu mirwano.

Ibi bitero byabanjirijwe no guturika kw'igisasu bikurikirwa n'urusaku rw'amasasu kuri ibi birindiro by'ingabo za Amerika.