'Nes i faddau a chofleidio'r gyrrwr a laddodd fy merch'

Mae mam a gollodd ei merch 17 oed mewn gwrthdrawiad ble roedd y gyrrwr dan ddylanwad alcohol a chyffuriau yn dweud iddi gofleidio'r dyn oedd yn gyfrifol wrth iddyn nhw grio gyda'i gilydd yn y carchar.

Bu farw Chloe Hayman ar 24 Gorffennaf 2022 wrth iddi deithio yng nghar Keilan Roberts.

Roedd Roberts wedi cymryd ketamine, cocên ac ecstasi, ac roedd dros y terfyn alcohol wrth iddo fynd â Chloe adref ar ôl noson allan ym Mhontypridd.

Trwy system cyfiawnder adferol, fe gafodd ei mam Danielle O'Halloran gwrdd â Roberts yn y carchar er mwyn ceisio dod o hyd i atebion.

Mae hi nawr yn gobeithio y gallan nhw, un diwrnod, siarad mewn ysgolion gyda'i gilydd i rybuddio pobl ifanc am ganlyniadau dinistriol gyrru dan ddylanwad alcohol a chyffuriau.

Dywedodd Danielle, 37, o Aberpennar, mai ei merch Chloe oedd ei ffrind gorau, ei bod yn "brydferth y tu mewn a'r tu allan", a'i bod yn arfer gweld y da ym mhawb.

Ar ôl i ddigwyddiad cerddorol ddod i ben am 04:00, dywedodd Danielle fod Chloe wedi aros ar ôl pan adawodd ei ffrindiau ac wedi ymddiried yn Roberts, a ddywedodd ei fod wedi trefnu lifft.

Tua phum munud o'i dŷ, penderfynodd ddod allan o'r cerbyd a gyrru ei gar ei hun er mwyn iddo allu mynd â hi adref yn y bore.

Eiliadau'n ddiweddarach, tarodd y car grid gwartheg, ac aeth un o'r rheiliau drwy'r ffenestr flaen, gan ladd Chloe.

Yn y misoedd ar ôl marwolaeth Chloe, dywedodd Danielle ei bod wedi'i llethu gan alar, dicter a chasineb, yn methu bwyta, cysgu na gweithredu'n iawn.

Roedd Roberts, o Rhymni, Sir Caerffili, wedi pledio'n euog i bedwar cyhuddiad yn ymwneud â marwolaeth Chloe.

Ar ôl iddo gael ei ddedfrydu ym mis Mehefin 2023, fe wnaeth ei theulu apelio yn llwyddiannus, gan gynyddu ei gyfnod o garchar i bum mlynedd a thri mis, a'r gwaharddiad gyrru i dros 12 mlynedd a hanner.

Mae Danielle yn cyfaddef ei bod hi yn casáu Roberts ar y dechrau, gan deimlo bod y dicter yn rhoi rhywfaint o reolaeth iddi, ond dywedodd iddi sylweddoli fod hynny yn niweidiol iddi.

"Ro'n i'n teimlo'n sâl y tu mewn gyda faint o ddicter a chasineb oedd gen i," meddai.

"A nes i feddwl, alla i ddim caniatáu i'r teimlad yma fy mwyta i fyny mwyach."

Tua blwyddyn ar ôl y digwyddiad fe wnaeth Danielle ddewis cwrdd â Roberts, oedd yn 22 oed bryd hynny.

"Roedden ni'n dau'n emosiynol pan gerddodd i mewn," meddai, gan egluro bod ganddi lawer o gwestiynau, gan gynnwys pam yr oedd wedi cymryd cyffuriau'r noson honno.

Yn fuan, dywedodd Danielle ei bod wedi sylweddoli nad oedd Roberts wedi bwriadu lladd Chloe - a'i fod ond yn ddyn ifanc oedd wedi gwneud "dewis anghywir".

"Ne i gofleidio fe a dweud 'mae'n ddrwg gen i mai ti yw'r un sy'n gorfod byw gyda hyn'.

Mae Danielle yn credu na allai unrhyw ddedfryd o garchar fod yn waeth na'r edifeirwch a'r euogrwydd gydol oes y mae Roberts yn ei deimlo.

"Rwy'n credu bod dod yn ôl i'r gymuned, mewn gwirionedd, yn anoddach oherwydd mae'n rhaid i chi wynebu pobl," meddai.

Disgrifiodd faddeuant nid fel dweud ei fod yn iawn, ond fel rhyddhau'r "chwerwder fel nad yw bellach yn rheoli sut rydych chi'n teimlo".

Dywedodd Danielle ei bod hi eisiau gwneud i bobl "feddwl ddwywaith" cyn gyrru dan ddylanwad alcohol a chyffuriau.

Mae'n dweud bod yn rhaid i gymdeithas wneud mwy i atal ymddygiad peryglus, cynnig cefnogaeth gymunedol, a hyrwyddo lles i amddiffyn pobl ifanc rhag "glamoreiddio" yfed a gweithgareddau niweidiol eraill.

Ychwanegodd, pe na bai Roberts wedi teimlo rheidrwydd i roi cynnig ar gyffuriau yn y lle cyntaf, efallai na fyddai'r gwrthdrawiad wedi digwydd.

Ers i'r ddau gwrdd, mae Roberts wedi cael ei ryddhau o'r carchar.

Dywedodd Danielle ei bod hi'n gobeithio yn y pendraw, pan y bydd ef yn barod, y gall y ddau fynd i siarad mewn ysgolion, gan rannu eu stori fel bod eraill yn deall y canlyniadau a gwneud penderfyniadau mwy diogel.

"Mae e [Roberts] bob amser yn dweud 'bydden i ddim yn dymuno'r teimlad hwn ar unrhyw un, unrhyw un yn y byd'," ychwanegodd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.