Dysgu Cymraeg yn Utica wedi 'helpu fi ffeindio fy llais eto'

Mae dysgu'r iaith Gymraeg wedi helpu Jen Rizio o Utica, Efrog Newydd i ymdopi gyda ei chyflwr niwrolegol a PTSD (Anhwylder Straen Wedi Trawma).

Dechreuodd Jen ddysgu'r iaith ar ôl cyfnod yn yr ysbyty yn Chicago pan oedd hi'n dioddef meigryn (migraine) ac mi glywodd enw lle Llanfairpwll am y tro cyntaf, fel mae'n sôn wrth Cymru Fyw: "Roedd gen i boen pen am flynyddoedd heb stopio.

"Yn 2020, o'n i'n gwylio fideo firal ar YouTube lle oedd Liam Dutton (y cyflwynydd tywydd) wedi dweud yr enw Llanfairpwll ac mi wnes i benderfynu dechrau dysgu Cymraeg yn y fan a'r lle."

Wedi gadael yr ysbyty, cychwynodd Jen ar sesiynau bioadborth (biofeedback) i helpu ei chyflwr gan ddefnyddio'r Gymraeg yn y sesiynau. Mae bioadborth yn cysylltu'r meddwl a'r corff drwy ddefnyddio synwyryddion i fonitro prosesau corfforol fel curiad y galon.

Meddai: "Roedd siarad Cymraeg y peth cyntaf i helpu fi gyda tyndra a circulation ar y sgrîn bioadborth. Dw i'n teimlo bod siarad Cymraeg wedi helpu ailweirio fy mrên."

Bu Jen hefyd yn gwylio rhaglen Now You're Talking Welsh am 10 munud dwywaith bob dydd ond daeth y trobwynt wedi iddi gychwyn dysgu Cymraeg efo tiwtor ar-lein, meddai: "Mi wnes i basio yr arholiad Mynediad yn 2024, ac mi af i i Gymru i sefyll yr arholiad Sylfaen ym mis Mehefin eleni.

"Mae fy niwtor yn bendigedig! Dw i'n teimlo bod y tiwtoriaid dysgu Cymraeg yn ardderchog yn paratoi y dosbarth i sefyll yr arholiadau."

Ac mae Jen wedi cwympo mewn cariad gyda'r Gymraeg, un o chwe iaith mae hi wedi ei ddysgu: "Dw i'n caru sain yr iaith; mae mor hwyl!

"Fy hoff bethau ydy'r llythrennau arbennig: ll, ch, ac yn y blaen. Hefyd dw i'n mwynhau sgwennu yn Gymraeg achos mae'r iaith mor disgrifiadol."

Yn ogystal â Chymraeg mae Jen yn siarad Saesneg, Sbaeneg, Eidaleg, ychydig o Hebraeg a Rwsieg - "ond Cymraeg ydy fy hoff un" meddai.

Y llynedd enillodd hi'r drydedd wobr am ei cherdd Fy Ffrind yng nghystadleuaeth Merched y Wawr i ysgrifennu barddoniaeth yn Gymraeg.

Mae ei hangerdd am yr iaith wedi arwain ati'n creu sianel YouTube i helpu dysgwyr eraill o'r enw Curious About Welsh? ac mae wedi cyfarfod llawer o bobl drwy ddysgu'r iaith erbyn hyn: "Dw i'n trio helpu pobl eraill i ddysgu Cymraeg achos dw i eisiau cadw hanes Cymru yn fyw.

"Yn anffodus, roedd y Blue Books a'r Welsh Not yn trio stopio bobl i siarad eich iaith, a newid iaith busnes a chyfraith i'r Saesneg.

"Rŵan, mae gan y Llywodraeth brosiect Cymraeg 2050: Miliwn o siaradwyr, a dw i'n gobeithio helpu cefnogi pobl i ddechrau siarad neu ailddechrau siarad Cymraeg efo ffrindiau, teulu ac yn y busnesau.

"Mae gen i lond bol o bobl yn galw Cymraeg yn 'useless'. Cymraeg ydy iaith yr wlad, iaith bobl Cymru. Cymru am byth!"

Mae Jen yn adnabod siaradwyr Cymraeg eraill yn America ac mae hi'n mynd i sgyrsiau Cymdeithas Madog: "Mi wnaeth pobl sgwennu ata i ar ôl gwylio fy sioe YouTube.

"Ro'n i wrth fy modd pan oedd yr actores Cathe B wedi gofyn i mi siarad efo hi ar ei rhaglen YouTube hi, The Aunty Sochelle Hour-Ish Show am siarad Cymraeg. Hefyd, mi wnes i siarad ar y radio lleol am fy nysgu Cymraeg ac y pwysigrwydd o drio pethau newydd.

"Dw i'n caru rhannu fy joio. Dwi'n awtistig a ieithoedd ydy fy hoff beth i ddysgu. Wrth gwrs, Cymraeg ydy fy hoff iaith i siarad.

"Mae gen i PTSD, ac mae siarad Cymraeg yn helpu fi teimlo mwy hyderus ac ymlaciol.

"Iaith y Nefoedd yn helpu fi ffeindio fy llais eto ac mae gen i obaith rŵan."

Y peth anoddaf am ddysgu Cymraeg yw'r treigliadau, meddai Jen: "Dw i'n siŵr does dim syndod mae'r treigladau yn anodd i mi, ond dw i'n trio fy ngorau glas."

Meddai Jen, sy' wedi bod i Fangor ac i Ynys Môn ym Mehefin 2024: "Mae gen i un person yn y dosbarth Sylfaen yn byw yn yr Unol Daleithiau hefyd.

"Yn anffodus, does dim llawer o bobl yn fy ardal i'n siarad Cymraeg, ond mae fy ffrind coleg gyda diddoreb yn dysgu.

"Dw i'n gobeithio symud i Gymru un dydd."

"Y sgwrs cyntaf ydy y mwya' anodd, ac wedyn bydd yn haws. I gychwyn, gwrandewch ar radio Cymraeg am 10 munud dwywaith y diwrnod. Ymarfer mwy a mwy. Ysgrifennwch eich rhestr siopa yn Gymraeg. Cyfrifwch yn Gymraeg. Trïwch gwrs dysgu Cymraeg. Gwyliwch fy rhaglen Curious About Welsh? a rhaglenni eraill ar Youtube.

"Mae'n iawn i wneud mistêcs neu defnyddio ychydig o eiriau Saesneg. Dal ati!"

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.