Colur a Gwisgoedd

Mae Y Twr yn dilyn dau gymeriad trwy dri chyfnod yn eu bywyd - ieuenctid, canol oed a henoed. Sut mae newid oedran person? Meinir Jones-Lewis a Maggie Reynish fu'n egluro.

Mae’r cymeriadau’n heneiddio o 16 i 70, "ond yn meddwl y gwyliwr mae’r oedran" meddai Meinir, "does dim rhaid iddyn nhw edrych yn 71 neu 16, dim ond 'u bod nhw’n cyfleu’r syniad o ieuenctid a rhywun yn heneddio. Roedd amserau saethu yn brin, felly roedd rhaid torri lawr ar roi lot o groen hen ac ati ar y cymeriadau. Da chi methu rhoi croen i wneud i rywun edrych yn ifanc beth bynnag. Dwi'n dibynnu ar y goleuo i helpu i’w gwneud nhw edrych yn ifanc" meddai.

Defnyddio gwallt oedd prif gyfrinach Meinir i gyfleu oedran y cymeriadau, "wig hir a frivolous i'r rhai ifanc a wig sy’n britho ar gyfer hen oed. Roedd rhoi mwstash ar Huw yn help hefyd".

Cymerai awr yr un i baratoi'r ddau actor pob dydd, "rhaid cael gwared o’u gwalltiau nhw’u hunain gynta, a ma hynny’n broses sy’n cymryd 15 munud yn ei hunan."

Nid yw gwaith Meinir yn gorffen ar hynny, rhaid iddi fod wrth law drwy gydol y dydd. "Ma lot o bethe’n gallu digwydd yn ystod ffilmio, dwi ‘di gorfod gwnïo wig Betsan ymlaen am ei fod mor hir, maen nhw’n rhedeg o gwmpas lot, felly ma rhaid sicrhau nad ydi o’n dod i ffwrdd". Yr ateb oedd rhoi lastig bands bach trwy'r gwallt a gwnïo’r rheiny i’r wig fel nad oedden nhw'n dod i ffwrdd.

"Ond ma 'na wastad rhywbeth all ddigwydd…"

Doedd dim cyfnod arbennig i'r gwisgoedd, gan ei bod hi'n ddrama oesol, "ond efallai fod ychydig o deimlad o'r pumdegau ar y dechrau" meddai Maggie Reynish, fu'n gyfrifol am y gwisgoedd. Ni ellir trefnu gwisgoedd nes i'r cynhyrchydd, y cyfarwyddwr a'r cynllunydd wneud y penderfyniadau eraill.

Delwedd neu 'look' yr actorion ddaw olaf yn ôl Maggie. Penderfynwyd ar liwiau'r gwisgoedd yn gyntaf gan fod lliwiau mor bwysig yn y ddrama ei hun. "Gwyn oedd lliw y set yn yr act gyntaf, felly dewisiais i wyn ar gyfer y bachgen a ffrog las a gwyn i'r ferch - lliwiau ifanc, glân a ffres." Roedd Maggie hefyd yn awyddus i ddewis lliwiau na fyddai'n tarfu'n ormodol ar y gwyliwyr.

Rhaid gweithio'n agos gyda'r actorion wrth baratoi unrhyw wisgoedd, gan fod y gwisgoedd yn chwarae rhan bwysig wrth eu helpu i gyfleu'r cymeriad. Yn yr ail act, rhoddwyd Huw mewn siwt oedd ychydig yn rhy fach iddo er mwyn rhoi edrychiad anghyffyrddus a milain iddo.

Chafodd dim un gwisg ei gwneud yn arbennig ar gyfer y ddrama; cael eu rhentu oedd 80% ohonynt fel nad oedden nhw'n edrych yn newydd sbon. "Defnyddiais i hen ffrog fy mam o'r 1950au ar Betsan yn yr act gyntaf" meddai Maggie.

Mae sicrhau dilyniant yn rôl bwysig iawn tra'n ffilmio i'r un sy'n gyfrifol am y gwisgoedd. Weithiau, mae'r un olygfa yn cael ei ffilmio ar ddiwrnodau gwahanol, felly rhaid sicrhau fod pob tei wedi ei glymu yr un ffordd, a strapiau ar ffrog yn yr un lle. I wneud pethau'n haws, mae'n arferol i wnïo'r actor i mewn i'w wisg.