Ymhlith sêr y noson roedd y canwr poblogaidd o Iwerddon, Ronan Keating, Elin Fflur a'r Alarm, gyda Mike Peters, a band y foment, The Feeling, a oedd yn rhuthro o Lerpwl wedi'r cyngerdd i wneud perfformiad arall.

Sêr eraill y noson oedd Jamelia, y Pipettes, band polca-dotiog y mae'r Gymraes Gwenno Saunders yn aelod ohonynt a Cherry Lee Mewis o Fae Colwyn - perfformiwr 21 oed sy'n cael ei disgrifio fel artist street soul.

Agorwyd y cyngerdd gan griw o bobl ifanc lleol sy'n aelodau o weithdy drama Teenz & Kidz.

Cynhyrchwyd yr achlysur mewn cydweithrediad â Chyngor Bwrdeistref Sirol Conwy mewn partneriaeth â'r Comisiwn Digwyddiadau.

Dyma ganolbwynt Apêl Plant mewn Angen y BBC yng Nghymru ac ar gyfer y cyngerdd, cafodd Stadiwm Athletau Parc Eirias, Bae Colwyn, ei drawsnewid yn arena ar gyfer 10,000 o bobl.

Mae uchafbwyntiau'r cyngerdd i'w weld ar y we drwy fynd i safle bbc.co.uk/pudseywales.

Mae BBC Plant mewn Angen eisoes wedi rhannu grantiau o dros £2.5 miliwn i elusennau cofrestredig, grwpiau cymunedol a gwirfoddol yng Nghymru yn 2006, nifer ohonynt yng ngogledd Cymru.