Mike Peters oedd prif ganwr y band roc mwyaf llwyddiannus o Gymru yn yr 1980au 'The Alarm' ond sydd bellach yn canu'n unigol ac yn cyflwyno rhaglen Radio Wales 'Bedrock'.

Yn sicr, dyma'r band mwyaf o Gymru yn ystod yr wythdegau. Fe chwaraeodd 'The Alarm' eu gig cyntaf yn Gwesty'r Fictoria ym Mhrestatyn ar 10 Mehefin 1981 gan ryddhau eu sengl cyntaf ar eu label eu hunain yn Nhachwedd y flwyddyn honno. Ond nid dyma'r tro cyntaf i Mike fod mewn band.

Roedd ei ddebut cerddorol ar 6 Hydref 1975 pan ffurfiodd grwp gyda chriw o ffrindiau ysgol, a Mike oedd y prif ganwr, i berfformio ym mharti pen blwydd ei chwaer yng ngwesty'r Talardy yn Llanelwy.

'Seventeen' oedd enw ei fand go iawn cyntaf a hynny ar ôl iddo weld y 'Sex Pistols' yn chwarae yng Nghaer yn 1976. Pan welodd ynni'r perfformiad fe wyddai mai dros dro yn unig y byddai ei swydd ym myd cyfrifiaduron ac felly ffurfiwyd 'Seventeen'.

Cawsant gyfle i gefnogi 'The Stray Cats' ar eu taith nhw ac roedd popeth yn mynd yn dda nes i Mike glywed am lofruddiaeth John Lennon. Fe gafodd y digwyddiad effaith dwfn arno ac fe benderfynodd newid cyfeiriad o bync at gerddoriaeth fwy ystyrlon.

Yn 1981 newidiodd 'Seventeen' yn 'The Alarm' ac fe symudodd aelodau'r band i Lundain er mwyn gwneud ymdrech go iawn i lwyddo. Arwyddwyd hwy gan Miles Copeland, rheolwr 'The Police' ac fe'u hanfonwyd i deithio yn America a newidiwyd eu byd go iawn.

Ar ôl cwblhau'r daith, aeth eu sengl '68 Guns' i frig y siartiau ac fe fur grwp yr un mor llwyddiannus yn ddiweddarach efo sawl sengl ac albwm arall.

Erbyn y 1990au cynnar, roedd poblogrwydd y grwp bellach ar drai ac wrth glywed cân 'Nirvana' 'Smells like Teen Spirit' sylweddolodd Mike fod dyddiau'r band drosodd mewn gwirionedd a phenderfynodd ddiddymu'r band.

Yn 1994 fe lansiodd ei yrfa fel canwr unigol a bellach mae o'n croesawu pobl o bedwar ban y byd i'r 'Gathering' gaiff ei gynnal ger ei gartref yn Nyserth yn flynyddol.

Yn 2001 aeth Mike ar y ffordd eto, yn un o'r criw 'Dead men Walking' sef casgliad o gerddorion yn ceisio creu 'Crosby, Stills, Nash a Young Prydeinig' yn cynnwys Pete Wylie o 'The Might Wah!', Glen Matlock gynt or 'Sex Pistols' a Kirk Brandon o 'Spear Destiny'. Trefnwyd ail daith yn 2002 i chwarae casgliad o ddeunydd hen a newydd.

Yn 1996, fe gurodd Mike gancer y 'Lymph' ac yn 2000 fe greodd 'Alarm' newydd ar gyfer taith gynhwysfawr iawn yn yr Unol Daleithiau.

Ei funud fawr: Wrth deithio yn yr Unol Daleithiau yn 1983 fe stopiwyd y band gan yr heddlu traffig er mwyn dweud wrthynt bod yn rhaid iddynt ddychwelyd i Brydain i berfformio ar 'Top of the Pops' gan fod '68 Guns' wedi cyrraedd rhif 1 yn y siartiau.

Yn answyddogol: Roedd cwmnïau recordiau yn amharod iawn i arwyddo 'Seventeen' gan eu bod yn cysgu ar lawr ac yn mynd i nunlle! Ond, roedd y band yn barod i wneud unrhyw beth, gan gynnwys dweud wrth hyrwyddwr mai band o Battersea oeddan nhw ac nid or Rhyl, er mwyn cael y cyfle i recordio.