Dewiswyd yr ysgol yma gan i Awen fod wedi gweithio yno cyn priodi.

Ar 22 Medi daliodd y ddau a'u beics - y trên saith am Gaerdydd, gan adael y Brifddinas ar eu hunion ar eu beics tua 11.30 o'r gloch yr un bore.

Erbyn 8.30 o'r gloch gyda'r nos roeddent wedi cyrraedd Gwesty Griffin, Felinfach, a hynny yn y tywyllwch ar ôl colli eu ffordd.

Teithiodd y ddau 60 milltir ar y diwrnod cyntaf.

Trannoeth, y nod oedd cyrraedd Llanidloes ac yn ôl Awen, roedd y tywydd yn ffafriol iawn iddynt.

Gan nad oedd ganddynt gymorth car i'w dilyn ac i gario eu bagiau, rhaid oedd i bopeth gael ei gario ar y beics. Tipyn o bwysau ychwanegol a dweud y lleiaf.

Er eu bod yn teimlo'n bur ffit roeddent yn flinedig iawn ar ddiwedd y dydd ac yn falch o gael cyrraedd Gwesty Lloyds yn Llanidloes i gael dadflino a chael noson o gwsg.

Ailgychwyn y bore trannoeth am Ddolgellau drwy goedwig Hafren am Benyffordd, a dringo i fan uchaf y Lon Las cyn disgyn i lawr am Fachynlleth.

Padlo eu ffordd wedyn drwy Aberllefenni a dringo coblyn o allt cyn mynd ar y goriwaered am Cross Foxes.

Penderfynu yno cymeryd y ffordd fawr am Ddolgellau gan anelu am Westy Penmaen Uchaf ym Mhenmaenpwl i ddathlu'r pen blwydd.

Aeth y diwrnod olaf â nhw drwy'r Bermo a Harlech ac roeddent yn ôl yn ddiogel ac yn croesi Pont y Borth tua 6.30 o'r gloch gyda'r nos.

Dipyn o wrhydri a dweud y lleiaf, ac Ysgol Pendalar yn elwa o tua £2,000 am eu hymdrech.

Go dda chi, am ddathlu'r pen blwydd mewn ffordd môr arbennig a chofio am eraill!