Ai gwir yw'r gair? Ai gwir yw'r gair?
Y stori fwyaf yn y byd,
Y darlun yn y ffenestr liw
O'r baban yn ei isel grud
Creawdwr mawr y sêr a'r lli
Yma yn blentyn erom ni?

Ai gwir yw'r gair? Cans os yw'n wir,
Beth yw ein holl brysurdeb ffôl,
A holl rialtwch gwag yr Ŵyl,
Y rhoi a'r rhoi er cael yn ôl,
Y paratoi â'r bysedd cu,
Y rhoddion oll a'r cardiau lu.

Beth ydyw cariad teulu hoff,
Neu garol yn yr eira gwyn?
Beth ydyw sain y clychau pêr
Gerbron yr un gwirionedd syn,
Creawdwr mawr y sêr a'r lli
Yn blentyn yma erom ni?

Morgan D Jones